Azərbaycanda qadın sahibkarlar ən çox hansı bölgədədir?

Cari ilin yanvar-mart aylarının nəticələrinə görə, iqtisadi rayonlar üzrə fərdi sahibkarların cins bölgüsündə kişilər üstünlük təşkil edib.

Xpress.az xəbər verir ki, ölkə üzrə 1 milyon 121 min 934 kişi, 350 min 564 qadın fərdi sahibkar qeydə alınıb. Xatırladaq ki, ötən ilin eyni dövründə bu göstərici kişilər üzrə 1 milyon 75 min 730, qadınlar üzrə isə 328 min 276 nəfər olub. Beləliklə, illik müqayisədə kişi sahibkarların sayı 46 min 204 nəfər və ya 4,3%, qadın sahibkarların sayı isə 22 min 288 nəfər və ya 6,8% artıb.

Cari ilin ilk 3 ayına görə, ən çox kişi və qadın sahibkar Bakı şəhərində cəmləşib - paytaxtda 283 min 323 kişi və 98 min 434 qadın fərdi sahibkar fəaliyyət göstərir.

Bakıdan sonra kişi sahibkarların sayına görə Lənkəran-Astara iqtisadi rayonu (115 min 953 nəfər), Qazax-Tovuz iqtisadi rayonu (82 min 916 nəfər) və Mərkəzi Aran iqtisadi rayonu (81 min 265 nəfər) ön sıralarda yer alıb.

Qadın sahibkarların sayına görə isə Bakıdan sonra Lənkəran-Astara iqtisadi rayonu (34 min 888 nəfər), Qazax-Tovuz iqtisadi rayonu (33 min 542 nəfər) və Mərkəzi Aran iqtisadi rayonu (24 min 675 nəfər) seçilib.

Ən az fərdi sahibkar isə Şərqi Zəngəzur iqtisadi rayonunda qeydə alınıb. Burada 6 min 30 kişi və 1 998 qadın sahibkar fəaliyyət göstərir.