“Barselona” “Real”ı məğlub edib çempion oldu

İspaniya La Liqasının 35-ci turu çərçivəsində futbolsevərlərin böyük maraqla gözlədiyi mövsümün son “El Klasiko”su baş tutub. “Barselona” doğma azarkeşləri önündə əzəli rəqibi “Real Madrid”i qəbul edib.

Gərgin və yüksək tempdə keçən qarşılaşmada üstün oyun nümayiş etdirən Kataloniya təmsilçisi qələbə qazanmağı bacarıb.

Matçın taleyini Markus Reşford və Ferran Torresin vurduğu qollar həll edib. Hər iki hissədə rəqibindən daha fəal görünən “Barselona” müdafiədə də etibarlı çıxış edərək qapısını toxunulmaz saxlayıb və görüşü 2:0 hesabı ilə başa vurub.

Bu qələbə “Barselona” üçün təkcə prinsipial rəqib üzərində uğur deyil, həm də çempionluğun rəsmiləşməsi ilə yadda qalıb. Hansi Flikin rəhbərlik etdiyi komanda mövsümün bitməsinə bir neçə tur qalmış La Liqa çempionluğunu təmin edib. Hazırda “Barselona” turnir cədvəlində ən yaxın izləyicisi olan “Real Madrid”i 14 xal qabaqlayır.

Beləliklə, Kataloniya klubu uğurlu mövsüm keçirərək İspaniya çempionu adına sahib çıxıb və azarkeşlərinə növbəti böyük sevinc yaşadıb.