Yarımştat işləyən tələbələrə XƏBƏRDARLIQ

Son illərdə Azərbaycanda tələbələr arasında oxuyarkən işləmək halları artmaqdadır. Bu tendensiya daha çox “ikinci iş” və ya paralel iş fəaliyyəti kimi qiymətləndirilir.

Təhsil eksperti Cahid İmanlı Bizim.Media-ya açıqlamasında bildirir ki, bu proses əsasən seçimdən deyil, iqtisadi ehtiyacdan qaynaqlanır.

Onun sözlərinə görə, xüsusilə regionlardan Bakıya təhsil almağa gələn tələbələr üçün iş artıq zərurətə çevrilib:

“Tələbələr arasında ikinci iş trendi birmənalı olaraq ehtiyacdan irəli gələn məsələdir. Çünki reallıqda tələbələr üçün iş məcburiyyətə çevrilib. Xüsusilə rayondan təhsil üçün gələnlər üçün ehtiyacları ödəmək çox çətindir.”

Ekspert qeyd edir ki, tələbələrin işləməsi onların təhsil keyfiyyətinə də mənfi təsir göstərir:

“İş həyatı tələbənin təhsilinə mənfi təsir edir. Yarım ştat işləyən tələbələrdə belə yuxu rejimi pozulur, dərslərə hazırlıq üçün vaxt qalmır. Hətta dərsdə iştirak etsələr belə, keyfiyyətli təhsil almaq çətinləşir.”

Cahid İmanlı hesab edir ki, tələbələrin işləməsi əsasən onların ixtisası ilə bağlı olmur və bu da uzunmüddətli fayda vermir:

“Tələbələrin böyük hissəsi öz ixtisası üzrə deyil, başqa sahələrdə — əsasən iaşə, xidmət və servis sektorunda işləyir. Diplom və vaxt problemi səbəbindən rəsmi ixtisas işlərinə qəbul olunmurlar.”

Ekspertin fikrincə, tələbə işi yalnız düzgün təşkil olunduğu halda faydalı ola bilər:

“İş təcrübəsi çox az qismən üstünlük yaradır. Amma bu, daha çox əməyə alışma prosesidir. Əgər tələbələr öz ixtisasları üzrə ödənişli təcrübəyə cəlb olunsalar, bu daha faydalı olar. Bunu dövlət proqramları ilə dəstəkləmək mümkündür.”