Könül Vəlibəylinin qızı dövlət başçısına müraciət etdi : “Sağalmağıma kömək edin” - VİDEO
Bakı Milli Geyim Evinin rəhbəri, mərhum Könül Vəlibəylinin qızı Ləman Qulamovanın vəziyyəti ağır olaraq qalır.
Xpress.az xəbər verir ki, Ləman Qulamova Azərbaycan Prezidenti İlham Əliyevə, Birinci vitse-prezident Mehriban Əliyevaya və Leyla Əliyevaya müraciət edərək müalicəsinin davam etdirilməsi üçün dəstək istəyib.
Müraciətində o bildirib: "Hörmətli cənab Prezident İlham Əliyev, hörmətli Birinci vitse-prezident Mehriban Əliyeva xanım və hörmətli Leyla xanım. Mən Ləman Qulamovayam. 2025-ci il noyabrın 21-də Yasamal rayonunda baş vermiş dəhşətli yanğın zamanı anamı itirmişəm, özüm isə ağır xəsarətlər almışam.
Hazırda xəstəxanada müalicə alıram. Mənə qida borusu-traxeya fistulu diaqnozu qoyulub. Ötən ilin noyabrından bəri ağızdan qidalana bilmirəm, jejunostomiya vasitəsilə bağırsaqdan qidalanıram. Bu müddətdə mənə dəfələrlə stent yerləşdirilib, müxtəlif əməliyyatlar, o cümlədən açıq cərrahi müdaxilə olunub. Lakin fistul hələ də qalır.
İndi yenidən ağır əməliyyata ehtiyacım var. Təəssüf ki, nənəm və babamın maddi imkanı bu əməliyyatın xərclərini qarşılamağa kifayət etmir. Sizdən xahiş edirəm ki, mənə kömək edəsiniz və əməliyyatın maliyyə yükünün qarşılanmasına dəstək göstərəsiniz. Məni sağaltmağa kömək edin. Hər an pnevmoniya riski ilə üz-üzəyəm. Buna görə də əməliyyatın təcili həyata keçirilməsi vacibdir. Əvvəlcədən minnətdarlığımı bildirirəm. Çox sağ olun".
Qeyd edək ki, ötən ilin noyabrında Yasamal rayonunda çoxmərtəbəli yaşayış binasında baş vermiş yanğın nəticəsində 1977-ci il təvəllüdlü Könül Hümbətova tüstüdən zəhərlənərək həyatını itirib. Onun qızı Ləman Qulamova isə ağır vəziyyətdə xəstəxanaya yerləşdirilmişdi.
Ləman Qulamova aylardır Türkiyənin "Acıbadem” Xəstəxanasında müalicə alıb. Hazırda isə onun müalicəsinin “Göztepe Medical Park Xəstəxanası”nda davam etdirilməsi planlaşdırılır.
