Azərbaycanda "Temu" ilə bağlı araşdırma başlandı
"Temu" platformasının fəaliyyətində ciddi qanun pozuntusu əlamətləri aşkarlanıb.
Xpress.az xəbər verir ki, Antiinhisar və İstehlak Bazarına Nəzarət Dövlət Agentliyi rəsmi araşdırmalara başlayıb.
Qurum platformanın sahibi olan "PDD Holdings" şirkətinə qarşı iş qaldırıb.
Araşdırma ölkənin rəqabət qanunvericiliyinin pozulması şübhəsi ilə aparılır. Şirkətin Rəqabət Məcəlləsinin müvafiq maddələrini pozduğu ehtimal edilir. Bura yüksək və ya aşağı inhisar qiymətlərinin tətbiqi daxildir.
"PDD Holdings" həmçinin hökmran mövqedən sui-istifadə etməkdə şübhəli bilinir. Şirkət bazarda rəqabəti məhdudlaşdıran xüsusi qiymət siyasəti yürüdür. İqtisadi əsas olmadan məhsulların maya dəyərindən aşağı satılması da araşdırılır. Hazırda rəsmi işə baxılması prosesi davam edir.
Yəni məşhur platforma olduqca ucuz qiymətlərlə yerli bazarda haqsız rəqabət mühiti yaratmaqda ittiham olunur.
