İsti havalarda başgicəllənmə və günvurmadan necə qorunmaq olar?

Havaların həddindən artıq isti keçməsi insanların sağlamlığı üçün ciddi risk yaradır. Xüsusilə açıq havada, küçələrdə və ictimai nəqliyyatda uzun müddət qalan şəxslərdə başgicəllənmə, halsızlıq, susuzlaşma və günvurma halları daha tez-tez müşahidə olunur.

Mütəxəssislər bildirirlər ki, isti havalarda mümkün qədər saat 11:00–17:00 aralığında birbaşa günəş altında qalmaqdan çəkinmək lazımdır. Zərurət olduqda kölgəlik yerlərə üstünlük verilməli, açıq rəngli və yüngül geyimlər seçilməli, başı günəşdən qorumaq üçün papaq və ya çətirdən istifadə edilməlidir.

Orqanizmin susuz qalmaması üçün gün ərzində kifayət qədər su qəbul etmək vacibdir. Şirin və qazlı içkilər əvəzinə adi suya üstünlük verilməsi tövsiyə olunur. Həmçinin ağır fiziki işlər və intensiv idman məşqləri günün sərin saatlarına salınmalıdır.

İctimai nəqliyyatda və ya açıq havada özünüzdə güclü başgicəllənmə, ürəkbulanma, halsızlıq, yüksək hərarət və ya huşun bulanması kimi əlamətlər hiss etdikdə, dərhal sərin yerə keçmək, su içmək və vəziyyət yaxşılaşmadıqda təcili tibbi yardım çağırmaq lazımdır.

Yaşlı insanlar, uşaqlar, hamilə qadınlar və ürək-damar, şəkərli diabet kimi xroniki xəstəlikləri olan şəxslər isti havanın təsirinə daha həssas olduqları üçün onlar xüsusilə ehtiyatlı olmalıdırlar.

Sadə qoruyucu tədbirlərə əməl etməklə isti havaların sağlamlığa mənfi təsirlərini minimuma endirmək mümkündür.

Xpress.az