Antiinhisar və İstehlak Bazarına Nəzarət Dövlət Agentliyi ilə Slovakiya arasında Anlaşma Memorandumu imzalanıb
Azərbaycan Respublikasının Prezidenti yanında Antiinhisar və İstehlak Bazarına Nəzarət Dövlət Agentliyi ilə Slovakiya Respublikasının Standartlaşdırma, Metrologiya və Sınaq İdarəsi arasında standartlaşdırma, qanunverici və elmi metrologiya, texniki tənzimləmə, uyğunluğun qiymətləndirilməsi və uyğunluğu qiymətləndirən qurumların akkreditasiyası sahələrində əməkdaşlığa dair Anlaşma Memorandumu imzalanıb.
Memorandumun məqsədi keyfiyyət infrastrukturu sahəsində tərəflər arasında institusional əməkdaşlığı gücləndirmək, beynəlxalq təcrübə və məlumat mübadiləsini genişləndirmək, həmçinin gələcək birgə fəaliyyət istiqamətlərini müəyyənləşdirməkdir. Sənədin iki ölkə arasında keyfiyyət infrastrukturu sahəsində əməkdaşlığın yeni mərhələyə yüksəlməsinə mühüm töhfə verəcəyi gözlənilir.
Anlaşma Memorandumunu Antiinhisar və İstehlak Bazarına Nəzarət Dövlət Agentliyinin sədri Elnur Bağırov və Slovakiya Respublikasının Azərbaycan Respublikasındakı fövqəladə və səlahiyyətli səfiri Elçin Qasımov imzalayıblar.
Memoranduma əsasən, tərəflər arasında texniki tənzimləmə, standartlaşdırma və metrologiya sahələrində informasiya mübadiləsi aparılacaq, həmçinin mütəxəssislərin peşəkar bilik və bacarıqlarının artırılması məqsədilə birgə seminarlar, konfranslar, elmi-texniki layihələr və təlimlər təşkil ediləcək.
Sənəd metrologiya sahəsində kalibrləmə və ölçmə imkanlarının inkişafını da nəzərdə tutur. Bu çərçivədə akkreditasiya olunmuş və akkreditasiya prosesində olan laboratoriyaların sınaq səriştəlilik proqramlarında və beynəlxalq laboratoriyalararası müqayisələrdə iştirakının təşviqi, akkreditə olunmuş uyğunluğun qiymətləndirilməsi qurumlarının sınaq nəticələrinin qarşılıqlı tanınmasının asanlaşdırılması, eləcə də beynəlxalq və regional təşkilatlar çərçivəsində əməkdaşlığın genişləndirilməsi istiqamətində birgə fəaliyyət həyata keçiriləcək.
