Göygöldə milli dəyərlərin bayramı: V Milli Yaylaq Festivalından REPORTAJ
Göygöl rayonunun Yeni Zod kəndində yerləşən “Xan Yurdu” entoqəsəbəsi növbəti dəfə Azərbaycanın milli-mədəni irsinin nümayiş olunduğu böyük bir festivala ev sahibliyi edir. Artıq ənənəyə çevrilən V Milli Yaylaq Festivalı ilk gündən yüzlərlə yerli və xarici turistin axını ilə yadda qalıb.
Səhər saatlarından etibarən festival məkanında canlanma hiss olunur. Ailələr, gənclər, turistlər və fotoqraflar yaylaq ərazisini gəzərək həm qədim el sənətlərini yaxından izləyir, həm də təşkil olunan tədbirlərdə iştirak edirlər. Dağ mənzərəsi fonunda səslənən milli musiqilər, folklor kollektivlərinin çıxışları və sənətkarların nümayiş etdirdiyi əl işləri ziyarətçilərə Azərbaycan mədəniyyətinin zənginliyini bir daha göstərir.
Festival Göygöl Rayon İcra Hakimiyyəti, Gənclər və İdman Nazirliyi, Türk Əməkdaşlıq və Koordinasiya Agentliyi (TİKA), Dünya Etnoidman Konfederasiyası və digər tərəfdaş qurumların dəstəyi ilə “Cavad Xan” Tarix və Mədəniyyət Fondu və “KAP.AZ” MMC-nin birgə təşəbbüsü əsasında keçirilir.
Festival ərazisində qurulan tematik guşələr gün ərzində ziyarətçilərin ən çox üz tutduğu məkanlara çevrilib. “Xan Çadırı”nda xalçaçılıq sənətinin incə nümunələri sərgilənir, ustalar qədim sənət ənənələrini canlı nümayiş etdirirlər. Oxatma, atçılıq, zorxana çıxışları və digər etnospor növləri isə həm yerli sakinlərin, həm də turistlərin böyük marağına səbəb olur.
Festivalın ən gur məkanlarından biri də Azərsun şirkətinin stendi idi. Gün ərzində burada ziyarətçi sıxlığı diqqət çəkirdi. Şirkət qonaqlara müxtəlif məhsullarını təqdim edir, bütün xidmətləri isə ödənişsiz şəkildə həyata keçirirdi. Xüsusilə uşaqlı ailələrin stendə böyük maraq göstərməsi, insanların uzun növbələrdə gözləməsi bu guşəni festivalın ən çox ziyarət edilən məkanlarından birinə çevirib.
Festival boyu aşıq musiqisi, folklor kollektivlərinin çıxışları, teatr tamaşaları, yorğa atların nümayişi, kəndirbazların və alovpüskürənlərin maraqlı performansları tamaşaçılara unudulmaz anlar yaşadır. “Yaylaq süfrəsi”ndə təqdim olunan milli mətbəx nümunələri isə qonaqlara Azərbaycanın bölgələrinə məxsus zəngin kulinariya ənənələrini yaxından tanımaq imkanı yaradır.
Təşkilatçıların sözlərinə görə, festivalın rəsmi açılış mərasimi iyulun 25-də keçiriləcək. Qarşıdakı günlərdə də müxtəlif mədəni, idman və əyləncə proqramlarının davam etdirilməsi nəzərdə tutulur və Göygöl yaylaqlarının daha minlərlə qonağı qəbul edəcəyi gözlənilir.
