Azərbaycanlı alimdən metaverse dövrünə yeni elmi baxış: "Rəqəmsal turizm folkloru" konsepsiyası təqdim olunub
Rəqəmsal texnologiyaların sürətlə inkişaf etdiyi müasir dövrdə folklorun gələcəyi necə olacaq? Ənənəvi mədəni irs virtual dünyada yaşaya biləcəkmi? Bu suallara cavab axtaran Azərbaycanlı alim, Xəzər Universitetinin dosenti Aynur Qəzənfərqızının "Azərbaycan Türk Mədəniyyət Metaversi: Rəqəmsal Turizm Folklorunun Yaranması, Qorunması və Tətbiqi" adlı elmi monoqrafiyası İmza Nəşrləri tərəfindən işıq üzü görüb.
Folklorşünaslıq, turizm və rəqəmsal humanitar elmlərin kəsişməsində yazılmış monoqrafiya elmi yeniliyi ilə seçilir. Əsərdə müəllif tərəfindən "Rəqəmsal turizm folkloru" konsepsiyası formalaşdırılaraq elmi dövriyyəyə təqdim edilir. Bununla yanaşı, metaverse, folklor və turizm ilk dəfə vahid konseptual çərçivədə əlaqələndirilir və bu sahənin nəzəri əsasları sistemli şəkildə izah olunur.
Monoqrafiyanın elmi redaktorları professor Füzuli Bayat və professor Bahadur Bilalovdur. Kitabın ön sözünün müəllifi professor Füzuli Bayat əsəri müasir folklorşünaslığın yeni mərhələsini əks etdirən, gələcək tədqiqatlara istiqamət verə biləcək sanballı elmi araşdırma kimi qiymətləndirib.
Əsərdə metaverse mühiti yalnız texnoloji yenilik kimi deyil, milli-mədəni irsin qorunması, folklorun yeni kommunikasiya mühitində yaşadılması və rəqəmsal turizmin inkişafı üçün perspektivli mədəni platforma kimi dəyərləndirilir. Müəllif göstərir ki, virtual aləmlər gələcəkdə yalnız əyləncə məkanı deyil, həm də xalqların mədəni yaddaşını yaşadan və dünyaya tanıdan yeni bir ekosistemə çevrilə bilər.
Monoqrafiyada Azərbaycan türk folklorunun metaverse platformalarında təqdim olunması, rəqəmsal irsin idarə olunması, virtual mədəni marşrutların yaradılması və gələcəyin turizm modelləri geniş elmi təhlil olunur. Kitabda irəli sürülən nəzəri yanaşmalar rəqəmsal humanitar elmlər və folklorşünaslığın inkişafı baxımından yeni perspektivlər açır.
Mütəxəssislərin fikrincə, əsərin ən mühüm cəhətlərindən biri mövcud beynəlxalq tədqiqatlarda ayrı-ayrılıqda araşdırılan metaverse, folklor və turizm anlayışlarını vahid elmi modeldə birləşdirməsi və "Rəqəmsal turizm folkloru" anlayışını konseptual səviyyədə əsaslandırmasıdır.
Yeni monoqrafiyanın folklorşünaslıq, turizm, kulturologiya, rəqəmsal humanitar elmlər və informasiya texnologiyaları sahəsində çalışan tədqiqatçılar üçün mühüm elmi mənbələrdən birinə çevriləcəyi gözlənilir.
