Fındığın 1 kiloqramı 19 manata çatıb? - Ekspertdən qiymətlərlə bağlı AÇIQLAMA
Dövlət Gömrük Komitəsinin açıqladığı məlumata görə, bu ilin yanvar-iyul aylarında Azərbaycandan xarici ölkələrə 100 milyon 232,7 min dollar dəyərində 8 min 892,5 ton fındıq ixrac olunub. Ötən ilin eyni dövrü ilə müqayisədə ixracın dəyəri 21,5 faiz artsa da, miqdarı 22,2 faiz azalıb. Eyni zamanda, ixrac edilən fındığın bir kiloqramının orta qiyməti 12,3 manatdan 19,2 manata yüksəlib.
Bu tendensiya dünya bazarlarında qiymət dəyişiklikləri ilə bağlıdır, yoxsa ölkədə istehsal və ixrac siyasətində baş verən dəyişikliklərin nəticəsidir? Mövcud vəziyyət Azərbaycanda qiymət artımına səbəb olacaq?
Redaktor.az-a danışan iqtisadçı Günay Hüseynova bildirdi ki, fındıq ixracı artsa da qiymətin yüksəlməsinə səbəb dünya bazarındakı qiymətlərlə əlaqədardır:
"Dünya bazarındakı qiymətin bu dərəcədə yüksəlməsinə səbəb isə ixracatda lider olan ölkələrdə istehsalın hava şəraiti və digər səbəblərdən azalması ilə əlaqədardır. Belə şəraitdə digər istehsalçı ölkələr hətta məhsulu daxili bazara çıxarmadan birbaşa ixraca yönləndirir. Bir məsələni də xüsusi ilə vurğulamaq istərdim ki, statistik rəqəmdə qeyd olunan məbləğ orta statistik qiymətdir və topdan qiymətidir. Yeni bu o demək deyil ki, fındığın 1 kiloqramı 19 manat 20 qəpiyə satılır, daxili bazarda alıcı bu qiymətə alacaq. Lakin növbəti il bayram ərəfəsi müəyyən qiyməti artımı ola bilər .Əgər məhsul ixracatında ixtisaslaşmış ölkənin ixracı yetəri qədər olarsa qiymətlər tənzimlənə bilər".
