Sosial şəbəkənin insan həyatına mənfi təsiri var? - Psixoloq Fərqanə Mehmanqızı açıqladı

"İnsanın nəyisə ideallaşdırması, gözəlliyin ən pik həddə çatdırılması və fantaziyasının bu fonda inkişaf etdirilməsi normaldır. Biz əslində bu gün sosial şəbəkəni pisləmək istəyirik. Amma nəzərə almalıyıq ki, burada mühüm, önəmli məqamlar var. Əvvəllər bədii əsərlərdə, yəni orta əsrlər dövründən belə, bədii əsərlərdə sevgi ideallaşdırılırdı, dostluq ideallaşdırılırdı, münasibətlər ideallaşdırılırdı, vətən sevgisi, eləcə də həyata baxış ideallaşdırılırdı. Bu ideallaşdırılmış əsərlərdən insanlar özlərinə bir ideal seçirdilər".

Bu sözləri Xpress.az-a açıqlamasında psixoloq Fərqanə Mehmanqızı danışıb.

"Gözəlliyin pik həddini elə gözəl qadın kimi də, insan surəti kimi də burada görürdülər. Gözəlliyi pik həddi kimi o əsərlərdə görür və ideallaşdırılmış əsərlərdə özlərini bənzətməyə çalışırdılar. Bunun sadəcə yeri dəyişib, sosial şəbəkələr olub. Təbii ki, psixohəssas insanlarda, özgüvənsiz insanlarda belə ideallaşdırılmış obrazlar həmişə bir travma yarada bilər. Amma bunu faciələşdirmək lazım deyil. Hər bir insan individualdır və başa düşməlidir ki, bu efirdir, bu ekran qarşısıdır, bu real həyat deyil. Amma yenə dediyim kimi, orta əsrlər dövründən də bədii əsərlərdə münasibətlər ideallaşıb, gözəllik anlayışı ideallaşıb; qadın gözəlliyi, kişi gözəlliyi ideallaşıb. Yəni, buna görədə bu gün sosial şəbəkələrin mənfi təsiri üzərində çox dayanırıq. Amma əslində ciddi şəkildə baxsanız görərsiniz ki, bədii əsərlərdə də bu var idi. Bu gün sadəcə bədii əsərlər yox, sosial şəbəkə aktiv həyatımızda var".

Aysel İbrahimli