Repetitor lazımdırmı? - Sabiq nazir açıqladı
Bir neçə il bundan öncəyə qədər şagirdlər həm repetitor yanına, həm də orta məktəbin sonuncu siniflərində məktəbə davamlı şəkildə gedirdilər. Amma son zamanlar repetitorla məşğul olan uşaqlarda məktəbə maraq zəifləyib, davamiyyət azalıb. Hətta hazırlıq dərslərini belə dərs zamanı məktəbdə edirlər. Bəzi məktəblərdə isə ümumiyyətlə normal dərs keçirilmir. Bundan əlavə, universitetə daxil ola bilməyən məzunlar çox ağır stress keçirirlər. Hətta sağlamlıqla bağlı problemlər yaşayırlar.
Bu problemlərlə bağlı fikirlərini Xpress.az-a açıqlayan AMEA-nın Riyaziyyat və Mexanika İnstitutunun direktoru, fizika-riyaziyyat elmləri doktoru, professor, sabiq təhsil naziri Misir Mərdanov bildirib ki, hazırda ölkədə məktəblilərin əksəriyyəti repetitor yanına gedir.
Onun qənaətincə, repetitor sistemi təhsili tamam gözdən salıb: “Azərbaycada bu gün hamı repetitor yanına gedir. Bu repetitor sistemi təhsili tamam gözdən salıb. Təəssüflər olsun ki, repetitor yanına gedən şagirdlərin məktəbə davamiyyəti çox zəifləyib. Getdikcə uşağın məktəblə bağı kəsilir. Belə getsə heç də yaxşı sonluqla nəticələnməyəcək. Hər kəs bunun qarşısını almaq üçün nələrsə etməlidir".
Professorun sözlərinə görə, ən böyük problemlərdən biri “hamı universitetə daxil olmalıdır” şüarıdır: “Repetitor yanına gedib zorla bir-iki sözü əzbərləyərək universiteta daxil olmaq üçün gecə-gündüz çalışıb özlərinə əziyyət edirlər. Təbii ki, valideynlər də, şagirdlər də çox böyük stres keçirirlər. Ümumiyyətlə, mən deyərdim ki, "hamı universitetə daxil olmalıdır " fikirini aradan qaldırmaq lazımdır. Məktəblərdə normal dərslər keçirilsin, hansısa peşə məktəbinə meyilli olan uşağı valideyn universitetə daxil olmağa məcbur etməməlidir. Çox yaxşı olar ki, onları istədikləri peşəyə yönəltmək üçün şərait yaratsalar. Belə olan halda bu qədər gərginlik olmaz. Əksər məktəblərdə normal dərslərin keçirilməməsinə gəlincə, mən inanıram və ümid edirəm ki, dövlət bu məsələnin qarşısını almaq üçün lazımlı addımlar atacaq”.
Afaq
