Ukrayna maliyyə böhranında -Avropadan asılı qaldı.
Xpress.az xəbər verir ki, nüfuzlu The Economist jurnalı Ukraynada yaranmış ciddi maliyyə böhranı barədə yazıb. Nəşrin məlumatına görə, əgər vəziyyət dəyişməzsə, Avropa İttifaqının maliyyə dəstəyi olmadan Ukraynanın vəsaitləri 2026-cı ilin fevralına qədər tükənə bilər.
Hesablamalara əsasən, münaqişənin başlanğıcından bəri Ukraynanın ümumi müdafiə xərcləri — Qərb silah tədarükləri və hərbi qrantlar da daxil olmaqla — 2025-ci ilin sonuna qədər təxminən 360 milyard dollar təşkil edəcək.
Təkcə 2025-ci ildə hərbi əməliyyatlara çəkilən xərclər 100–110 milyard dollara çatıb. Bu rəqəm ölkə ÜDM-nin yarısı qədərdir və tarixi rekord sayılır.
Jurnal qeyd edir ki, Ukraynanın üç əsas maliyyə mənbəyindən ikisi — ABŞ yardımı və daxili borclanma — artıq tükənmək üzrədir. ABŞ-da Donald Trampın hakimiyyətə gəlməsi və Vaşinqtonun aylıq maliyyə köçürmələrini dayandırmasından sonra Kiyevin yeganə ümid yeri Avropa hesab olunur.
