Bakıda yetkinlik yaşına çatmayan şəxsi dilənçilik etdirənlə bağlı QƏRAR
Bakı Apellyasiya Məhkəməsində yetkinlik yaşına çatmayan şəxsi məcburi əməyə məcbur etməkdə təqsirləndirilən Vüsal Cəfərovun (ad, soyadı şərtidir) barəsindəki hökmdən verilən apellyasiya şikayəti üzrə məhkəmə prosesi başa çatıb.
Hakim Zamin İbrahimovun sədrliyi ilə keçirilən prosesdə qərar elan edilib.
Qərara əsasən, apellyasiya şikayəti təmin edilməyib.
İttihama görə, Vüsal Cəfərov 2023-cü ilin sentyabr ayının ortalarında, tamah məqsədilə, zor tətbiq etməklə, zor tətbiq etmək hədəsi və hədə-qorxu gəlməklə 2017-ci il təvəllüdlü, yetkinlik yaşına çatmayan Maqsud Bəhlulovun (adı, soyadı şərtidir) nəzarətsiz qalmasından istifadə edib, onu Bakı şəhəri, Suraxanı rayonu, Qaraçuxur qəsəbəsi ərazisindəki nömrəsiz evin yaxınlığından götürərək özünün evinə aparıb.
Sonradan o, yetkinlik yaşına çatmayan zərərçəkmişi dilənçilik etməyə və gündəlik pul gətirməyə məcbur edib, tapşırıqları yerinə yetirməyəcəyi və ya evdən icazəsiz çıxacağı təqdirdə onu və ailə üzvlərini hüquq-mühafizə orqanları vasitəsilə həbs etdirəcəyi ilə hədələyərək psixi təzyiq göstərib.
Həmçinin Vüsal zor tətbiq etməklə – əl və ayaqları ilə döyməklə, əlinə yanan siqaret kötüyü basmaqla zərərçəkmişə müxtəlif yüngül dərəcəli xəsarətlər yetirib, azadlığını məhdudlaşdıraraq onu 2023-cü ilin sentyabr ayının ortalarından 2024-cü ilin yanvar ayının ortalarına qədər müddətdə Bakı şəhəri, Sabunçu rayonu, Zabrat qəsəbəsi ərazisində gündəlik 30-120 manat pul gətirmək məqsədilə dilənçiliyə məcbur edib.
Bakı Ağır Cinayətlər Məhkəməsinin hökmü ilə o, 7 il 6 ay müddətinə azadlıqdan məhrum edilib.
