Kamala Harris 2028-ci ildə prezident seçkilərində iştirak edə bilər
ABŞ-ın keçmiş vitse-prezidenti Kamala Harris BBC-yə verdiyi müsahibədə gələcəkdə yenidən prezident seçkilərində iştirak edə biləcəyini istisna etməyib.
Xpress.az xəbər verir ki, Londonun mərkəzində “Sunday with Laura Kuenssberg” proqramına müsahibə verən Harris, siyasi karyerasının hələ bitmədiyini bildirib:
“Mən hələ tamamlamamışam. Xidmət etmək mənim qanımdadır, bu, həyat tərzimdir”, – deyə o qeyd edib.
Kamala Harris 2024-cü ildə Donald Trampa uduzsa da, 2028-ci ildə Ağ Ev uğrunda yenidən mübarizə aparmaq niyyətində ola biləcəyini söyləyib. O, gələcəkdə bir qadının ABŞ prezidenti olacağına inandığını vurğulayıb və “ola bilsin, bu mən olum” ifadəsini işlədib.
Siyasətçi həmçinin Trampı “diktator” adlandıraraq, onun ədliyyə sistemindən və federal qurumlardan siyasi rəqiblərinə qarşı istifadə etdiyini bildirib:
“O, Ədliyyə Nazirliyini silaha çevirəcəyini demişdi və indi məhz bunu edir. Tənqidə dözə bilmir, bir zarafat üçün bütün media orqanını susturmağa çalışır.”
Harris ABŞ biznes dairələrini və bəzi təsisatları da “hakimiyyətə yaxın olmaq üçün Trampın qarşısında diz çökməkdə” ittiham edib.
Ağ Ev sözçüsü isə Harris-in bu açıqlamalarına sərt reaksiya verib:
“Kamala Harris seçkiləri uduzdu və amerikalılar onun yalanlarına inanmadı. İndi də xarici mediada narazılığını dilə gətirir,” – deyə bəyanatda bildirilib.
Kamala Harris hazırda “107 Gün” adlı kitabını təqdim edir. Kitabda o, Co Baydenin yarışdan çəkilməsindən sonra qısa müddət ərzində apardığı prezident kampaniyasını və həmin dövrdəki çətinlikləri təsvir edib.
Harris müsahibəsində Baydenin sağlamlıq vəziyyəti və kampaniyanın gedişi ilə bağlı suallara konkret cavab verməsə də, 2024-cü ildəki məğlubiyyətinin əsas səbəbi kimi “gec start götürməsini” göstərib.
Hazırda kitab turnesi ilə Avropa ölkələrini gəzən Harris siyasi arenadan tam uzaqlaşmaq niyyətində olmadığını açıq şəkildə göstərib. Müşahidəçilər hesab edirlər ki, onun bu səfərləri 2028-ci il seçkiləri üçün yeni kampaniyanın başlanğıcı ola bilər.
