Dünyanın ən sıx yerləşən əhalisi BƏLLİ OLDU
BM-nin hesabatına görə bu şəhər 42 milyonluq əhalisi ilə dünyanın ən böyük megaşəhərinə çevrilib. Tokio üçüncü yerə geriləyərkən, Dəkkə ikinci sıraya yüksəlib. Asiya nəhəngləri qlobal şəhər sıralamasını tamamilə dəyişdirib.
Dünya əhalisi sürətlə artdıqca megaşəhərlərin sayı da hər il çoxalır. Birləşmiş Millətlər Təşkilatının (BM) son məlumatlarına əsasən, 1975-ci ildə cəmi səkkiz olan, əhalisi 10 milyonu keçən megaşəhərlərin sayı bu gün 33-ə çatıb. Amma ən diqqətçəkən məqam uzun illərdir dünyanın ən böyük metropolü sayılan Tokionun zirvəni itirməsidir.
BM-nin “2025 Dünya Şəhərləşmə Proqnozları” hesabatı göstərir ki, İndoneziyanın paytaxtı Cakarta təxminən 42 milyon əhalisi ilə dünyanın ən böyük megaşəhərinə çevrilib. Bu rəqəmə Cakartanın özündən əlavə Boqor, Depok, Tanceraq, Cənub Tanceraq və Bekasi kimi ətraf bölgələr də daxildir.
Tokio 33 milyon əhali ilə üçüncü yerə düşüb, Banqladeşin paytaxtı Dəkkə isə 40 milyon nəfərlə ikinci sıraya yüksəlib. Asiya xaricindən ilk onluğa daxil ola bilən yeganə şəhər Misirin paytaxtı Qahirədir.
BM-nin İqtisadi və Sosial İşlər Departamentinin rəhbəri Li Junhua bildirib ki, sürətlə böyüyən şəhərlər əsrin qalan hissəsini formalaşdıracaq. Onun sözlərinə görə, şəhərləşmə “iqlim fəaliyyəti, iqtisadi inkişaf və sosial bərabərlik üçün dəyişdirici bir gücdür”. Junhua qeyd edib ki, ölkələr balanslı inkişaf üçün yaşayış, nəqliyyat və ictimai xidmətləri həm şəhər, həm də kənd bölgələrində paralel şəkildə nəzərə almalıdır.
Cakartanın birinci yerə yüksəlməsi mütəxəssislərin fikrincə təəccüblü deyil. Şəhərsalmaya dair tədqiqatçılar Böyük Cakarta bölgəsinin əhalisinin artıq uzun müddətdir Tokionu geridə qoyduğunu bildiriblər. Lakin bu sürətli genişlənmə ciddi problemlər yaradır: sıx nəqliyyat, daimi izdiham, hava çirkliliyi, tez-tez baş verən sel fəlakətləri və şəhərin bəzi hissələrində davam edən çökmə riski.
Məhz bu çətinliklər səbəbindən İndoneziya hökuməti 2019-cu ildə paytaxtı Borneo adasında salınan yeni şəhər — Nusantaraya köçürməyi planlaşdırmışdı. Lakin tikintinin gözlənildiyindən yavaş getməsi və yetərli investisiya çatışmazlığı prosesi xeyli gecikdirir.
