Dünyanın ən ağır binası hər gün getdikcə torpağa batır

Dünyanın ən ağır binası hər gün bir az da torpağa batır

Rumıniyanın paytaxtı Buxarestdə yerləşən Parlament Sarayı təkcə möhtəşəm görünüşü ilə deyil, həm də inanılmaz çəkisi ilə dünya rekorduna sahibdir. Təxminən 4,1 milyon ton ağırlığında olan nəhəng bina öz kütləsi səbəbindən hər il torpağa bir qədər də batır.

Göydələnlər hündürlükləri ilə yarışdığı halda, Buxarestin mərkəzində yerləşən Parlament Sarayı çəkisi ilə diqqət çəkir. “Dünyanın ən ağır binası” hesab edilən bu tikili, mütəxəssislərin hesablamalarına görə, hər il orta hesabla 6 millimetr torpağa çökür.

Bina Rumıniyanın keçmiş kommunist lideri Nikolay Çauşeskunun güc və dəbdəbə ehtirasının simvolu kimi inşa olunub. Tikintisinə 1984-cü ildə başlanılan saray Çauşeskunun sağlığında istifadəyə verilsə də, onun dövründə tam başa çatdırıla bilmədi. Bu səbəbdən Parlament Sarayı həm memarlıq, həm də siyasi abidə kimi qiymətləndirilir.

Rəqəmlərlə nəhəng tikili

Parlament Sarayını unikal edən təkcə ölçüləri deyil, tikintidə istifadə olunan materialların miqdarıdır. Binada:

• 700 min ton polad və bürünc,

• 1 milyon kubmetr mərmər,

• 900 min kubmetr ağac,

• 3 500 ton kristal materialdan istifadə edilib.

Bu qədər böyük kütlə Buxarest torpağı üzərində ciddi təzyiq yaradır. Mütəxəssislərin fikrincə, məhz buna görə bina illər keçdikcə milimetr-milimetr yerə batır. Tikili yerüstündə 84 metr hündürlüyə malikdir, yeraltı hissəsi isə 92 metr dərinliyə enir. Ümumi istifadə sahəsi 365 min kvadratmetrdir.

Baş memar cəmi 28 yaşında idi

Layihənin baş memarı Anka Petresku milli müsabiqəni qazandığı zaman cəmi 28 yaşında idi. Təxminən 700 memarın iştirak etdiyi layihədə on minlərlə fəhlə çalışıb. Tikintinin ən intensiv dövrlərində şantiyədə növbəli şəkildə 100 minə yaxın insan işləyib.

Rəsmi məlumatlara görə, tikinti zamanı 27 nəfər həyatını itirib. Lakin qeyri-rəsmi iddialar bu rəqəmin daha yüksək ola biləcəyini bildirir. Parlament Sarayının memarlıq üslubu isə neoklassik elementlərlə sosialist realizmin sərt sintezindən ibarət kimi xarakterizə olunur.