Qərəz, lobbi və ikili standartlar: : Avropa Parlamentinin Azərbaycana qarşı oyunu
Avropa Parlamentinin Azərbaycanla bağlı növbəti qərəzli qərar qəbul etməsinə hansı siyasi, hüquqi və geosiyasi amillərin təsir göstərdiyi müzakirə olunur. Qərarın formalaşmasında konkret maraqların, eləcə də daxili və xarici təsir qüvvələrinin rolunun olub-olmaması diqqət mərkəzindədir. Məsələ ilə bağlı Milli Məclisin komitə sədri Tahir Rzayev Xpress.az-a açıqlama verib.
Onun sözlərinə görə, Avropa Parlamenti uzun illərdir Azərbaycan həqiqətlərini təhrif edən, saxta və böhtan xarakterli bəyanat və qətnamələr qəbul etməklə öz qərəzli mövqeyini nümayiş etdirir. Son qəbul edilən qətnamə də heç bir fakta əsaslanmayan, sırf sifarişli yanaşmanın növbəti nümunəsidir və bu sənədlərin Azərbaycan üçün real hüquqi və siyasi əhəmiyyəti yoxdur.
Tahir Rzayev vurğulayıb ki, Azərbaycan Avropa İttifaqının üzvü deyil və bu qurum qarşısında hər hansı öhdəlik daşımır. Bu səbəbdən Avropa Parlamentinin qəbul etdiyi qətnamələr ölkəmizə hüquqi baxımdan zərər vura bilməz. Onun fikrincə, belə sənədlər müəyyən dairələrin diktəsi və sifarişi ilə hazırlanır və burada erməni lobbilərinin, eləcə də Azərbaycana qarşı düşmən mövqedə olan qüvvələrin təsiri açıq şəkildə hiss olunur.
Komitə sədri bildirib ki, hazırda Avropa Parlamenti ciddi korrupsiya qalmaqalları ilə üz-üzədir və bir sıra deputatların korrupsiya əməllərinə görə mühakimə olunması bu qurumun nüfuzuna ciddi zərbə vurub. Bu faktlar Avropa Parlamentinin artıq obyektiv və prinsipial mövqedən çıxış etmədiyini, ayrı-ayrı maraq qruplarının təsiri altına düşdüyünü göstərir.
Tahir Rzayev qeyd edib ki, Azərbaycan bu gün Avropa dövlətləri ilə sıx əməkdaşlıq edir və Avropanın enerji təhlükəsizliyinin təmin olunmasında mühüm rol oynayır. Hazırda 14 Avropa ölkəsinə Azərbaycan qazı ixrac olunur. Belə bir şəraitdə Avropa Parlamentinin Azərbaycana qarşı qərəzli qətnamələr qəbul etməsi, ilk növbədə, elə Avropanın öz maraqlarına ziddir.
Açıqlamada o da vurğulanıb ki, Azərbaycanda siyasi baxışlara görə kütləvi həbslər aparılması barədə səsləndirilən iddialar əsassızdır. Dövlət çevrilişinə cəhd və digər ağır cinayətlərdə ittiham olunan şəxslərin istintaq prosesinə müdaxilə edilməsinə yönələn çağırışlar Azərbaycanın suverenliyinə və hüquqi sisteminə təzyiq kimi qiymətləndirilməlidir. Belə şəxslərin “siyasi məhbus” kimi təqdim edilməsi yalan və böhtan xarakteri daşıyır.
Komitə sədri əlavə edib ki, Azərbaycanda etnik azlıqlara qarşı hər hansı ayrı-seçkilik mövcud deyil və ölkədə yaşayan bütün xalqlar bir ailə kimi sülh və qarşılıqlı hörmət şəraitində yaşayır. Avropa Parlamentinin bu cür saxta faktları gündəmə gətirməsi və qərəzli qətnamələr qəbul etməsi isə siyasi riyakarlıq və ikili standartlardan başqa bir şey deyil.
Onun sözlərinə görə, sifariş əsasında hazırlanan bu qətnamələr real təsir gücünə malik olmayan, dəyərsiz sənədlərdir və tarixdə sadəcə kağız parçası kimi qalmağa məhkumdur.
Afaq Qurbanzadə
