Bayram öncəsi TƏHLÜKƏ – Uşaqlar “zırpaket’ləri necə alıb-satırlar?
“Bayram gəldi, heç bilmirəm neyləyim”, – deyən nəsil gedib, yerinə bayram gəlməmiş nə edəcəyini bilən nəsil yetişib. Hər vasitə ilə lazım olanı əldə edib, öz istəyinə məharətlə nail olan uşaqlar qadağan olunmuş pirotexniki vasitələri, xalq dili ilə desək, “zırpaket”ləri asanlıqla tapa bilirlər.
Bildiyimiz kimi, bayram ərəfələrində pirotexniki vasitələrin satışı qadağandır. Düzdür, şəhərin hər tərəfində, özəlliklə də qəsəbələrdə “partlayış” səslərini eşitmək olur və istər-istəməz sual yaranır ki, bəs bu partlayıcı vasitələri uşaqlar hardan əldə edirlər?
Maraqlı odur ki, qadağan olunmuş “zırpaket”lərin satışı artıq təkcə gizli satıcıların yox, uşaqların və yeniyetmələrin öz aralarında qurduğu qeyri-rəsmi alver şəbəkəsinin bir hissəsinə çevrilib: məhəllə içində, məktəbli çantalarında və sosial şəbəkələr vasitəsilə əlçatan olub. Nəticədə təhlükəsizlik baxımından ciddi risklər yaradan yeni satış üsulunun qurbanları da elə uşaqların özləri olur.
Məsələn, Sabunçu rayonu Bakıxanov qəsəbəsindəki 94 saylı məktəbin qarşısında baş vermiş hadisəni xatırtrlayaq: 17 yaşlı Eşqi Rüstəmov ayağının altına atılan pirotexniki vasitədən həyəcan keçirərək halı pisləşmiş, xəstəxanada dünyasını dəyişmişdi. Hər gün belə faciəvi sonluqlar baş verməsə də, bu cür vasitələri yandırarkən, yaxud düzgün istifadə etmədikdə, yaralanmalar qaçılmazdır. Səhhəti zəif olan böyüklər isə o partlayıcıların səsindən iş-güclərinə ehtiyatla gedib-gəlirlər.
Bəs uşaqlar arasında pirotexniki vasitələrin gizli üsullarla satılmasının qarşısını almaq üçün Daxili İşlər Nazirliyi (DİN) hansı xüsusi tədbirlər həyata keçirilir?
DİN-in mətbuat xidmətinin əməkdaşı Lumu İsrəfilli Bizim.Media-ya bildirdi ki, pirotexniki məmulatlar mülki dövriyyəsi məhdudlaşdırılmış əşyaların siyahısına daxil edilib və onun dövriyyəsinə müvafiq dövlət qurumu tərəfindən verilən “xüsusi icazə” əsasında yol verilir. Pirotexniki məmulatların satışı aşkar olunarkən həmin vasitələr satışdan çıxarılır, satışı ilə məşğul şəxslər barəsində İnzibati Xətalar Məcəlləsinin müvafiq maddəsi ilə inzibati xəta tərkibi haqqında protokol tərtib olunaraq baxılması üçün səlahiyyətli orqana - məhkəmələrə göndərilir. Təhlükəsizlik standartlarına cavab verməyən bu vasitələr insan sağlamlığına mənfi təsir göstərməklə yanaşı, tez alışan maddə olduqlarına görə ətrafa da ciddi ziyan vura bilərlər.
L. İsrəfilli həmçinin diqqətə çatdırdı ki, sosial şəbəkələrdə kustar üsulla kimyəvi maddələrin birləşdirilməsi yolu ilə təhlükəli partlayıcı maddələrin hazırlanmasını təbliğ edən paylaşımlardan məlumatlıdırlar.
“Bu cür məzmunların yayılması insan həyatı və sağlamlığı üçün ciddi təhlükə yaradır. Polis əməkdaşları tərəfindən internet resurslarında təhlükəsizlik riskləri doğuran halların qarşısının alınması məqsədilə qanunvericiliyə uyğun qəti tədbirlər görülür. Bir daha diqqətə çatdırırıq ki, izləyici toplamaq və diqqət çəkmək məqsədilə həyata keçirilən bu cür məsuliyyətsiz hərəkətlər ağır nəticələrə səbəb ola bilər. Vətəndaşları təhlükəli və qanunazidd əməllərdən çəkinməyə çağırırıq”.
