Masazır sakinlərinə ŞAD XƏBƏR - AVTOBUS ZOLAĞI...
525 nömrəli marşrutda istismar olunan avtobuslar mərhələli qaydada yenilənir. Yaxın zamanlarda həmin avtobuslar da xətt üzrə fəaliyyətə başlayacaq.
Xpress.az xəbər verir ki, bu barədə jurnalist Elgün Mənsimovun "Facebook" hesabındakı paylaşımına cavab olaraq Azərbaycan Yerüstü Nəqliyyat Agentliyindən bildirilib.
Jurnalist qeyd edib ki, bu il avtobusların sayı artırılsa da, interval azalmayıb. 10-15 dəqiqədən-bir gələn avtobuslar isə dolu olur: "Sürücülər saxlamır, saxlasalar da, minməyə yer yoxdur. İnsanlar rəsmən presslənir".
AYNA-dan isə cavab olaraq vurğulanıb ki, bu il 10 müasir və komfortlu avtobus sözügedən xətt üzrə daşımalara cəlb edilib:
"Hazırda marşrutda 20-21 avtobus 5-6 dəqiqə intervalla fəaliyyət göstərir. Lakin günün pik saatlarında marşrutun hərəkət sxemi üzrə yaranan nəqliyyat sıxlığı intervalın artmasına səbəb ola bilir. Qeyd edək ki, daşıyıcı tərəfindən daha 10 müasir və komfortlu avtobus xətt üzrə fəaliyyət göstərməsi üçün gətirilib. Yaxın zamanlarda həmin avtobuslar da xətt üzrə fəaliyyətə başlayacaq. Avtobusların intervallarının azaldılması məqsədilə avtobus zolaqları şəbəkəsi yaradılır".
