Ekspertlər bayram günlərində onlayn fırıldaqçılıq barədə XƏBƏRDARLIQ EDİR

Xpress.az xəbər verir ki, sosial Şəbəkələr və Mesencerlərin Peşəkar İstifadəçiləri Assosiasiyasının rəhbəri Vladimir Zıkov RT-yə açıqlamasında bildirib ki, Yeni il ərəfəsində və bayram günlərində mesajlaşma tətbiqlərində fırıldaqçıların fəaliyyəti ənənəvi olaraq artır.

Onun sözlərinə görə, fırıldaqçılar insanların bayram əhval-ruhiyyəsindən, istirahət rejimindən, səs-küydən və emosional fondan istifadə edirlər. Bəzi hallarda isə spirtli içki qəbulu insanların informasiyaya tənqidi yanaşmasını daha da zəiflədir.

Zıkov qeyd edib ki, hücumların pik həddi yalnız 1 yanvara təsadüf etmir. Fırıldaqçılıq halları adətən dekabrın son günlərindən başlayır və Yeni il tətilinin ilk günlərinə qədər davam edir.

Ekspertin sözlərinə görə, bu dövrdə fırıldaqçıların bayram təbrikləri, açıqcalar, səsli və video mesajlar axınına qarışması daha asan olur. Bayram məzmunu adı altında onlar fişinq keçidləri, zərərli fayllar, eləcə də guya hədiyyələr, ödənişlər və bonuslar barədə mesajlar göndərirlər.

Bundan əlavə, Yeni il tətilləri zamanı banklar, mobil operatorlar və dövlət qurumları ilə operativ əlaqə saxlamaq çətinləşir. Hücum edənlər bu vəziyyətdən istifadə edərək təzyiqi artırır və süni təcili durum yaradırlar.

“Fırıldaqçılar üçün Yeni il bayram deyil, adi iş günüdür. Onlar insanların bu dövrdə faktları yoxlamaqdansa emosiyalara güvəndiyini yaxşı bilirlər. Bu il əsas təhlükələrdən biri təbrik kartları adı altında göndərilən viruslardır. Məsələn, Happy New Year.jpg.apk adlı fayl əslində şəkil yox, zərərli tətbiqdir”, – deyə Zıkov vurğulayıb.