Azərbaycanda əcnəbilərlə bağlı 11 ayda 21 mindən çox qanun pozuntusu aşkarlandı -RƏSMİ
Azərbaycanda miqrasiya proseslərinin tənzimlənməsi və əcnəbilərin əmək fəaliyyətinin qanuni əsaslarla həyata keçirilməsi dövlət siyasətinin əsas prioritetlərindən biri olaraq qalır. Cari ilin 11 ayı ərzində bu sahədə həm müraciətlərin sayı, həm də qanunsuz miqrasiyaya qarşı görülən tədbirlər diqqətçəkən həddə çatıb.
Dövlət Miqrasiya Xidmətinin Xpress.az-ın sorğusuna verdiyi məlumata görə, 11 ay ərzində əcnəbilərin Azərbaycan ərazisində haqqı ödənilən əmək fəaliyyəti ilə məşğul olması üçün işəgötürənlər tərəfindən ümumilikdə 10 612 müraciət edilib. İş icazələri əcnəbiləri işə cəlb edən hüquqi şəxslər, sahibkar fiziki şəxslər, eləcə də xarici hüquqi şəxslərin filial və nümayəndəlikləri vasitəsilə alınıb.
Bildirilib ki, əmək miqrasiyası Miqrasiya Məcəlləsinə uyğun olaraq Dövlət Miqrasiya Xidməti tərəfindən tənzimlənir və iş icazələri hər il üzrə Nazirlər Kabinetinin təsdiq etdiyi əmək miqrasiyası kvotası çərçivəsində verilir. Qeyd olunub ki, işğaldan azad edilmiş ərazilərdə əmək fəaliyyətinə cəlb edilən əcnəbilər bu kvotaya daxil edilmir. İşəgötürənlər isə əcnəbilərlə yalnız iş icazəsinin qüvvədə olduğu müddətə əmək müqaviləsi bağlamalıdırlar.
Eyni zamanda, tənzimlənməyən miqrasiyaya qarşı həyata keçirilən tədbirlər nəticəsində cari ilin 11 ayı ərzində miqrasiya sahəsində inzibati hüquqpozmalarla bağlı 21 568 qərar qəbul edilib. Dövlət Miqrasiya Xidməti vurğulayıb ki, bu tədbirlər miqrasiya proseslərinin qanunvericiliyə uyğun və şəffaf şəkildə tənzimlənməsinə xidmət edir.
Afaq Qurbanzadə
