Həmrəylik Günü münasibətilə tədbir keçirilib
Həmrəylik Günü münasibətilə təşkil olunan tədbir həm məktəbimizdə təhsil alan şagirdləri, həm də ziyarət edilən uşaq bağçasının balaca sakinlərini sevindirmək məqsədi daşıyırdı. Tədbir çərçivəsində şagirdlərin iştirakı ilə xüsusi açıqçalar hazırlandı və məktəbin bütün şagirdlərinə paylandı. Əsas məqsəd bağçadakı hər bir uşaq üçün səmimi ürək sözləri yazmaq, sevgi, ümid və xoş arzuları bölüşmək idi.
Bu xeyirxah təşəbbüsdə peşə təmayüllü siniflərin şagirdləri xüsusi fəallıq göstərdi. Dərzi köməkçisi ixtisası üzrə təhsil alan şagirdlər hədiyyə torbalarının tikilməsində, kompüter operatoru ixtisaslı şagirdlər dizayn işlərinin hazırlanmasında, qənnadçı və aşbaz köməkçisi ixtisaslı şagirdlər isə şirniyyat və müxtəlif dadlı təamların hazırlanmasında böyük zəhmət sərf etdilər.
Eyni zamanda məktəbin 8, 9, 10 və 11-ci sinif şagirdləri açıqçalara öz ürək sözlərini yazaraq onları hədiyyə torbalarına yerləşdirdilər. Müəllimlər, məktəbin direktoru və bütün şagird kollektivi Yeni il və Həmrəylik Günü münasibətilə uşaqlar üçün hədiyyələrin hazırlanmasında birlik və həmrəylik nümayiş etdirdi.
Açıqçalarda yazılan ürək sözləri olduqca səmimi və duyğulu idi. Şagirdlər Yeni il münasibətilə xoşbəxtlik, uğur, sevgi, ümid və parlaq gələcək arzularını balacalarla bölüşdülər. “Siz dəyərlisiniz!”, “Yaxşı ki, varsınız!”, “Yeni iliniz mübarək!” kimi səmimi ifadələr uşaqların sevincinə sevinc qatdı.
Bağçaya etdiyimiz ziyarət zamanı uşaqların sevinc dolu gülüşləri hər kəsin qəlbində silinməz iz buraxdı. Bağçanın rəhbərliyi və kollektivi şagirdlərimizi böyük səmimiyyətlə qarşıladı. Bir həftə ərzində görülən zəhmətin nəticəsi balaca uşaqların üzündəki təbəssümdə öz əksini tapdı və bu anlar yaddaşımıza əbədi həkk olundu.
Bu tədbir bir daha göstərdi ki, sevgi yaymaq, mehriban olmaq və doğru yolu seçmək gələcəyimizin əsas təməlidir. Birlik və həmrəylik içində addımlayaraq uşaqlarımızı peşəsini sevən, Vətəninə, ailəsinə və xalqına layiqli vətəndaşlar kimi yetişdirə bilərik.
Bu xatirə həm balacaların, həm də şagirdlərin yaddaşında uzun müddət yaşayacaq. Belə təşəbbüslərin bütün təhsil ocaqlarında həyata keçirilməsi isə hər birimiz üçün nümunə olmalıdır. Bir daha anladıq ki, gələcək şagirdlərin əlindədir və bu gələcəyi yalnız birlikdə daha gözəl edə bilərik.
