Alimlər qadınlar və kişilər üçün çəki artımının ən riskli yaşlarını müəyyən ediblər
Britaniyanın Forza Supplements şirkətinin diyetoloqları 1000 nəfərin iştirak etdiyi bir neçə tədqiqatın nəticələrini təhlil edərək qadınlar və kişilər arasında çəki artımının ən sürətlə baş verdiyi yaş dövrlərini müəyyən ediblər.
Araşdırmanın nəticələrinə görə, qadınlar 35–40 yaş aralığında, kişilər isə 40–45 yaş arasında çəki artımına və piylənməyə daha həssas olurlar. Mütəxəssislər hesab edir ki, çəki artımının pik nöqtəsi qadınlar üçün orta hesabla 38 yaş, kişilər üçün isə 44 yaş hesab olunur.
Bu nəticələrə gəlmək üçün tədqiqatçılar iştirakçıların həyat tərzini, o cümlədən qidalanma vərdişlərini, iş yükünü və şəxsi münasibətlərinin keyfiyyətini ətraflı şəkildə analiz ediblər.
Araşdırma göstərib ki, kişilər arasında çəki artımının əsas səbəblərindən biri iş və karyera ilə bağlı stressdir. Məlumata görə, kişilərin 36 faizi həddindən artıq yeməyi məhz iş stressi ilə əlaqələndirir. Karyerada irəliləmək istəyi isə çox vaxt idman və fiziki aktivliyi ikinci plana keçirir.
Qadınlarda isə çəki artımı daha çox ailə faktorları ilə bağlıdır. Xüsusilə uşaq sahibi olduqdan sonra həyat tərzinin dəyişməsi, ailə üzvləri ilə birlikdə daha tez-tez və daha çox yemək vərdişi bu prosesə təsir göstərir.
Mütəxəssislər qeyd edirlər ki, bu yaş dövrlərində balanslı qidalanma, fiziki aktivlik və stressin idarə olunması çəki artımının qarşısını almaqda həlledici rol oynayır.
