Azeri Light enir, maliyyə yastığı qalxır: Azərbaycan qlobal dalğaya necə tab gətirir? - Professordan açıqlama
Dünya bazarında “Azeri Light” neftinin ucuzlaşması Azərbaycanın büdcə proqnozlarına və valyuta gəlirlərinə təsirsiz ötüşmür. Bu baxımdan neft qiymətlərindəki dəyişkənlik fonunda iqtisadiyyatın dayanıqlılığının qorunması mühüm əhəmiyyət daşıyır.
Məsələ ilə bağlı Milli Məclisin III, IV, V və VI çağırış deputatı, iqtisad elmləri doktoru, professor Rüfət Quliyev Xpress.az-a açıqlamasında bildirib ki, dünya iqtisadiyyatında və maliyyə sistemində baş verən istənilən dəyişikliklər Azərbaycan iqtisadiyyatından yan keçmir və bu, birmənalıdır. Onun sözlərinə görə, əsas məsələ dövlətin həyata keçirdiyi siyasətin bu neqativ təsirlərin ölkə iqtisadiyyatına minimum səviyyədə sirayət etməsinə yönəlməsidir.
Professor vurğulayıb ki, Azərbaycanın kifayət qədər güclü maliyyə “yastığı” mövcuddur: “Qızıl-valyuta ehtiyatlarımız ümumdaxili məhsulu üstələyir. Mərkəzi Bankın son açıqlamaları da bunu bir daha təsdiqlədi. Səhv etmirəmsə, bir il ərzində Mərkəzi Bankın ehtiyatları 5 faizdən çox artıb. Bu isə onu göstərir ki, Azərbaycan ən azı iki il ərzində dünya iqtisadiyyatında baş verən istənilən proseslərə dözmək imkanına malikdir”.
Rüfət Quliyev qeyd edib ki, Azərbaycan öz yoluyla irəliləyir və bu yol aydın, praqmatik və realistdir: “Biz iqtisadiyyatın diversifikasiyasına xüsusi önəm veririk, qeyri-neft sektorunun ÜDM-də və ixracda payını artırmağa çalışırıq. Neft-qaz kəmərlərinin istismarı və tranzit imkanları hesabına valyuta gəlirləri əldə edirik. Eyni zamanda nəqliyyat layihələrimiz sürətlə inkişaf edir və bu sahədə də böyük perspektivlər mövcuddur”.
Deputat yaşıl energetikanın inkişafını da xüsusi vurğulayaraq bildirib ki, Azərbaycan artıq yaşıl enerji istehsalına və onun ixracına başlayıb: “Bu proses hələ ilkin mərhələdə olsa da, gələcək üçün çox ciddi imkanlar açır”.
Bununla belə, professor etiraf edib ki, qlobal iqtisadi proseslərin təsirləri tamamilə aradan qalxmır: “Təbii ki, dünya iqtisadiyyatında baş verən dəyişikliklərin təsirini hiss edirik və gələcəkdə də hiss edəcəyik. Lakin mövcud iqtisadi strategiya bu təsirləri idarəolunan səviyyədə saxlamağa imkan verir”.
Afaq Qurbanzadə,Xpress.az
