" Təkrar Estetik Əməliyyatlara Müraciət edənlərin 30%-i Bədən Dismorfik Pozuntusu ilə Üzləşir” -PSİXOLOQDAN XƏBƏRDARLIQ

Müasir dövrdə estetik əməliyyatların kütləvi xarakter alması, hətta real ehtiyac olmadığı halda təkrar-təkrar aparılması psixoloji problemlərin göstəricisi sayıla bilərmi və bu tendensiyanın cəmiyyət üçün uzunmüddətli nəticələri nədən ibarət ola bilər? — sualı cəmiyyətdə maraq yaradıb.

Mövzu ilə bağlı psixoloq Zeynəb Ayyubova Xpress.az-a açıqlama verib.

Psixoloq Zeynəb Ayyubova bildirib ki, müasir dövrdə estetik əməliyyatların geniş yayılması təkcə tibbi və ya estetik məsələ deyil, eyni zamanda ciddi psixoloji aspektlərə malik bir fenomendir. Onun sözlərinə görə, real tibbi və ya funksional ehtiyac olmadığı halda estetik müdaxilələrin təkrar-təkrar aparılması bəzi hallarda psixoloji problemlərin göstəricisi kimi dəyərləndirilə bilər.

Zeynəb Ayyubova qeyd edib ki, psixoloji baxımdan bu tendensiya daha çox bədən obrazı ilə bağlı narazılıq, aşağı özünədəyər hissi və xarici təsdiqə həddindən artıq ehtiyacla əlaqələndirilir. Psixoloqun sözlərinə görə, bəzi insanlarda bədən dismorfik pozuntusu müşahidə olunur və bu zaman şəxs bədənində real olmayan və ya əhəmiyyətsiz qüsurları şişirdilmiş formada qəbul edərək onları aradan qaldırmaq üçün davamlı şəkildə estetik müdaxilələrə müraciət edir. O vurğulayıb ki, əməliyyatlardan sonra qısa müddətli məmnunluq hissi yaransa da, daxili narazılıq qalır və insan yeni “qüsurlar” axtarmağa başlayır.

Psixoloq diqqətə çatdırıb ki, sosial media və idealizə olunmuş gözəllik standartları bu prosesi daha da gücləndirir. Onun sözlərinə görə, filtrlərlə formalaşdırılmış “ideal görünüş” anlayışı real bədənlə virtual obraz arasında ciddi uyğunsuzluq yaradır və nəticədə fərd öz təbii görünüşünü qəbul etməkdə çətinlik çəkir, estetik müdaxiləni isə psixoloji boşluğu dolduran vasitə kimi görməyə başlayır.

Zeynəb Ayyubova cəmiyyət üçün uzunmüddətli nəticələrə də toxunaraq bildirib ki, bu tendensiya bir sıra riskli istiqamətlərdə təsir göstərə bilər. Onun sözlərinə görə, ilk növbədə gözəlliyin yalnız xarici görünüş üzərindən dəyərləndirilməsi dərinləşir, daxili keyfiyyətlər, fərdilik və psixoloji sağlamlıq arxa plana keçir. Bu hal xüsusilə gənclər və yeniyetmələr arasında özünəinam problemlərinin artmasına, müqayisə davranışının güclənməsinə və psixoloji narahatlıqların erkən yaşlarda formalaşmasına səbəb ola bilər.

Psixoloq əlavə edib ki, estetik əməliyyatların normallaşması cəmiyyətdə bədənə qarşı daha sərt və tələbkar münasibətin formalaşmasına gətirib çıxarır. Onun fikrincə, insanlar bədənlərini “təbii varlıq”dan çox, “dəyişdirilə bilən obyekt” kimi qəbul etməyə başlayırlar ki, bu da uzunmüddətli perspektivdə daim özünü yetərsiz hiss edən, daxili məmnunluq tapmaqda çətinlik çəkən və narazı fərdlərdən ibarət bir cəmiyyət modelinin yaranmasına yol aça bilər.

Sonda Zeynəb Ayyubova vurğulayıb ki, estetik müdaxilə özü-özlüyündə problem deyil. Onun sözlərinə görə, əsas problem insanın daxili psixoloji çətinliklərini yalnız xarici dəyişikliklər vasitəsilə həll etməyə çalışmasıdır. Psixoloq hesab edir ki, sağlam yanaşma estetik qərarların psixoloji şüur, özünü qəbul etmə və daxili balans nəzərə alınmaqla verilməsidir və xüsusilə təkrar estetik müdaxilələrdən əvvəl psixoloji dəyərləndirmənin aparılması həm fərd, həm də cəmiyyət üçün daha sağlam nəticələr verə bilər.

Afaq Qurbanzadə, Xpress.az