Haqqın, ədalətin, mübarizənin QALİBİYYƏT TARİXİ - FOTO
Müzəffər Azərbaycan Ordusunun qəhrəmanlığı sayəsində Xocalı şəhidlərinin qanı yerdə qalmadı
2020-ci ildə baş verən Vətən müharibəsi nəticəsində Azərbaycan Ordusu 30 ilə yaxın işğal altında olan torpaqlarımızı azad etməklə regionda yeni reallıq yaratdı. Azərbaycan Ordusu torpaqlarımızı azad etməklə təkcə hərbi deyil, mənəvi bir dönüş yaratdı. “Dəmir yumruq” iradənin, birliyin və ədalətin rəmzinə çevrildi. 44 gün ərzində göstərilən igidlik, fədakarlıq və əzm sübut etdi ki, şəhidlərimizin qanı yerdə qalmır.
Bu mübarizə Xocalı qurbanlarının da qisasının alındığı bir tarixi mərhələ oldu. 2023-cü ilin sentyabrında Qarabağda keçirilən lokal xarakterli antiterror əməliyyatı nəticəsində Xocalı şəhərinin separatçılardan təmizlənməsi tariximizin ən mühüm səhifələrindən biridir. Bu hadisə ilə Xocalı artıq təkcə faciə ilə deyil, qələbə və ədalətlə də xatırlanır.
2023-cü il oktyabrın 15-də isə hər bir azərbaycanlının qürurla xatırlayacağı an yaşandı. Azərbaycan Respublikasının Prezidenti İlham Əliyev Xocalı şəhərində Dövlət Bayrağımızı ucaltdı. Bu, sadəcə bir bayraq deyil idi - bu, illərlə gözlənilən haqqın, səbrin və mübarizənin rəmzi idi.
Bu gün tarix müəllimi kimi dərs dedikdə Xocalını yalnız faciə kimi deyil, ədalətin bərpa olunduğu bir dərs kimi anlatmaq imkanım var.
Şəhidlərimizin ruhu qarşısında baş əyərək deyə bilərik ki, onların qanı yerdə qalmadı.
Samara ƏSGƏRLİ
Gəncə şəhəri Nəriman Nərimanov adına 25 nömrəli tam orta ümumtəhsil məktəbinin tarix müəllimi
