Dərinlikdən gələn xəbərdarlıq: “Qiyamət balıqları” niyə sahilə çıxır?

Alim ABŞ sahillərində üç “qiyamət balığı”nın peyda olması ilə bağlı xəbərdarlıq edib

Amerikalı bioloq Stefan Börns ABŞ sahilləri yaxınlığında üç “qiyamət balığı” kimi tanınan Avar balığının aşkar olunması ilə bağlı narahatlığını bildirib. Bu barədə aif.ru alimin sosial media hesabına istinadən məlumat yayıb.

Alimin sözlərinə görə, bu balıqlardan ikisi fevralın sonunda Meksika sahillərində, daha biri isə martın 4-də Vyetnam çimərliyində tapılıb. Qeyd edilir ki, bu bölgələrdə son vaxtlar zəlzələlər qeydə alınıb və bu proseslərin digər regionlara, o cümlədən ABŞ-a təsir edə biləcəyi ehtimal olunur.

Börns bildirib ki, belə hadisələr əvvəllər də böyük zəlzələlərdən əvvəl müşahidə olunub. Məsələn, 2011-ci il Tohoku zəlzələsindən əvvəl də oxşar hallar qeydə alınmışdı.

Alimlərin bir fərziyyəsinə görə, avar balıqları ətraf mühitdəki elektrik və elektromaqnit sahələrinə çox həssasdır. Güclü zəlzələlərdən əvvəl yaranan elektromaqnit dəyişiklikləri bu balıqların dərin sulardan səthə çıxmasına səbəb ola bilər.

Börns həmçinin qeyd edib ki, balıqların sahilə çıxması Saturn və Neptunun Böyük Birləşməsi baş verən günə təsadüf edib. Onun sözlərinə görə, bu cür planetar hadisələr təxminən hər 36 ildən bir baş verir.

Alim hesab edir ki, hazırda Mərkəzi Amerika, ABŞ və ABŞ-ın qərb sahillərində güclü zəlzələ riskinə dair xəbərdarlıqlar diqqətlə izlənməlidir. Onun fikrincə, Meksika yaxın aylarda da yüksək seysmik risk bölgələrindən biri olaraq qalır.

Bəzi məşhur öncəgörənlər – məsələn, Vanqa və Nostradamus – tərəfindən irəli sürülən proqnozlarda da 2026-cı ildə, o cümlədən İran ətrafında hərbi münaqişələr və təbii fəlakətlərin baş verə biləcəyi qeyd edilir.

Xpress.az