Alimlər qaşıqların yoxa çıxmasının sirrini araşdırıblar

Britaniyalı alimlər ofislərdə və müxtəlif müəssisələrdə illərdir müşahidə edilən maraqlı bir fenomeni — çay qaşıqlarının yoxa çıxmasını araşdırıblar.

Xpress.az xəbər verir ki, bu barədə “Daily Mail” nəşri “Brain Communications” jurnalına istinadla məlumat yayıb.

Edinburq Universitetinin tədqiqatçıları araşdırma çərçivəsində 48 yeni qaşıq (yarısı qızıl, yarısı gümüş) əldə edərək onları işçilərin istirahət otaqlarında yerləşdiriblər. Onlar qaşıqları on ay müddətində gizli şəkildə müşahidə ediblər.

Nəticələr göstərib ki, bu müddət ərzində qaşıqların təxminən üçdə ikisi yoxa çıxıb. Maraqlıdır ki, qızıl qaşıqlar gümüş qaşıqlara nisbətən daha tez itirilib — onların “yarımömür” müddəti 182 gün, gümüş qaşıqların isə 280 gün təşkil edib.

Hesabatda qeyd olunur ki, qaşıqlar ofis mühitində gündəlik istifadə üçün vacib əşyalar olsa da, onların böyük hissəsi zamanla müəssisənin müxtəlif yerlərində “itkin düşür” və ya ümumiyyətlə tapılmır.

Tədqiqatçılar bu araşdırmanın 2005-ci ildə Melburnda aparılan oxşar bir təcrübədən ilhamlandığını bildiriblər. Həmin araşdırmada 70 qaşığın 80 faizinin beş ay ərzində yoxa çıxdığı müəyyən edilib.

Alimlərin hesablamalarına görə, ofisdə sabit qaşıq ehtiyatını saxlamaq üçün il ərzində təxminən 250 yeni qaşıq alınması lazım ola bilər.