Su obyektlərindən xüsusi məqsədlər üçün istifadəyə görə ödənişlərin tətbiqində YENİLİK
Azərbaycan Dövlət Su Ehtiyatları Agentliyi yanında fəaliyyət göstərən Suların İstifadəsinə və Mühafizəsinə Dövlət Nəzarəti Xidməti bildirir ki, su obyektlərindən xüsusi məqsədlər üçün istifadə ilə bağlı ödənişlərin tətbiqinə 2026-cı il 1 sentyabr tarixindən başlanılacaq.
Su obyektlərindən xüsusi məqsədlər üçün istifadə dedikdə hüquqi şəxslər və hüquqi şəxs yaratmadan sahibkarlıq fəaliyyəti ilə məşğul olan fiziki şəxslər tərəfindən texniki qurğu və avadanlıqlardan istifadə etməklə su obyektlərindən suyun götürülməsi, təmizlənmiş tullantı sularının su obyektlərinə axıdılması, habelə su akvatoriyalarından istifadə nəzərdə tutulur.
Su götürülməsinə görə ödəniş məbləğləri su obyektinin növündən və istifadənin məqsədindən asılı olaraq müəyyən edilir. Belə ki:
Sənaye məqsədləri üçün Xəzər dənizindən götürülən hər 100 m³ suya görə – 0,40 manat;
Çay və göllərdən götürülən hər 100 m³ suya görə – 4 manat;
Yeraltı sulardan götürülən hər 100 m³ suya görə – 40 manat.
Tullantı sularının axıdılmasına görə isə:
Xəzər dənizinə axıdılan hər 100 m³ tullantı suyu üçün – 1 manat;
Çay və göllərə axıdılan hər 100 m³ tullantı suyu üçün – 4 manat ödəniş nəzərdə tutulur.
Ödəniş məbləğləri barədə daha ətraflı məlumatla Su obyektlərindən xüsusi məqsədlər üçün istifadə ilə bağlı ödənişlərin məbləğləri sənədində tanış olmaq mümkündür.
Su obyektlərindən xüsusi məqsədlər üçün istifadə icazəsinin alınması üçün ilk növbədə Azərbaycan Dövlət Su Ehtiyatları Agentliyinə ərizə ilə müraciət edilməlidir. Ərizəçi fəaliyyət növündən və hüquqi statusundan asılı olaraq tələb olunan sənədləri təqdim etməli, icazə aldıqdan sonra müvafiq müqavilə bağlamalı və 2026-cı il 1 sentyabr tarixindən etibarən müəyyən edilmiş ödənişləri həyata keçirməlidir.
İcazənin verilməsi proseduru Su obyektlərindən xüsusi məqsədlər üçün istifadəyə icazənin verilməsi Qaydası ilə tənzimlənir.
Müvafiq qanunvericilik aktları ilə aşağıdakı keçidlər vasitəsilə tanış olmaq mümkündür:
“Su obyektlərindən xüsusi məqsədlər üçün istifadəyə icazənin verilməsi Qaydası”
“Su obyektlərindən xüsusi məqsədlər üçün istifadə ilə bağlı ödənişlərin məbləğləri”
Sonda su obyektlərindən xüsusi məqsədlər üçün istifadə edən bütün fiziki və hüquqi şəxsləri sudan səmərəli istifadə etməyə, su itkilərinin və israfçılığın qarşısını almağa, istifadə olunan suyun uçotunu düzgün aparmağa və su qanunvericiliyinin tələblərinə ciddi riayət etməyə çağırırıq.
