Xpress.az xəbər verir ki, Aston Martin bu həftəsonu keçiriləcək Belçika Qran Prisinin ilk sərbəst yürüş sessiyasında Fernando Alonsonun yerini komandanın rəsmi ehtiyat və üçüncü pilotu Cek Krouforda verəcəyini təsdiqləyib.
Beləliklə, Krouford Yaponiya və Avstriyadan sonra 2026-cı il mövsümündə AMR26bolidi ilə üçüncü dəfə rəsmi sərbəst yürüş sessiyasında iştirak edəcək.
Formula 1 reqlamentinə əsasən, hər komanda mövsüm ərzində ən azı dörd sərbəst yürüş sessiyasında gənc pilota şans verməlidir. Bu səbəbdən Aston Martin-in mövsümün sonrakı mərhələlərində Kroufordu daha bir dəfə sükan arxasına keçirəcəyi gözlənilir.
Fernando Alonso üçün isə bu, 2026 mövsümündə yerini gənc pilota verəcəyi son sərbəst yürüş olacaq. İspaniyalı pilot mövsümün əvvəlində, Yaponiya Qran Prisində də bolidini Cek Krouforda həvalə etmişdi.
Bu qərar həm də komanda yoldaşı Lens Strollun mövsümün qalan hissəsində daha bir sərbəst yürüş sessiyasını buraxacağı anlamına gəlir. Kanadalı pilot Avstriya Qran Prisində də yerini gənc pilota vermişdi və reqlament tələbinə uyğun olaraq daha bir dəfə eyni addımı atmalı olacaq.
