“Bilik Günü”nə həsr olunmuş Təhsil Forumu keçirilib – “Təhsil Fədailəri” kitabı təqdim olunub
13 sentyabr tarixində “Edu Forum” MMC-nin təşkilatçılığı ilə “Bilik Günü”nə həsr olunmuş Təhsil Forumu keçirilib.
Tədbirdə təhsil ictimaiyyətinin nümayəndələri, müəllimlər, təlimçilər, məktəb rəhbərləri və təhsil sahəsinə töhfə verən müxtəlif şəxslər iştirak ediblər.
Forum bilik və təcrübə mübadiləsi, əməkdaşlıq və təhsilin gələcəyinə dair baxışların müzakirəsi platforması kimi təşkil olunub. Tədbir çərçivəsində təhsilin mövcud vəziyyəti və gələcək perspektivləri, müəllimin cəmiyyətdə rolu, təhsildə inkişaf, innovativ yanaşmalar və əməkdaşlığın əhəmiyyəti barədə fikir mübadiləsi aparılıb.
İştirakçılar öz təcrübələrini bölüşərək təhsil sahəsində yeni ideya və təşəbbüslərin vacibliyinə diqqət çəkiblər.
Forumun əsas və yaddaqalan məqamlarından biri isə “Təhsil Fədailəri” kitabının təqdimatı olub.
Kitab Azərbaycan təhsilinə uzun illər xidmət edən, fəaliyyəti ilə təhsilin inkişafına töhfə verən insanların əməyinin gələcək nəsillərə çatdırılması məqsədilə hazırlanıb. Təqdimat mərasimində təhsil sahəsində fədakar əməyin və müəllimlik missiyasının cəmiyyət üçün əhəmiyyəti vurğulanıb.
Bildirilib ki, “Bilik Günü” yalnız biliyin qeyd olunduğu tarix deyil, həm də biliyin formalaşmasına və gələcək nəsillərə ötürülməsinə ömrünü həsr edən insanların əməyinə ehtiram göstərmək üçün əlamətdar gündür.
Tədbirdə çıxış edənlər qeyd ediblər ki, təhsil yalnız dərs, məktəb və tədris proqramlarından ibarət deyil. Təhsilin əsasını insan, fədakarlıq, əməkdaşlıq, məsuliyyət və gələcəyə inam təşkil edir.
“Edu Forum” MMC tərəfindən təşkil olunan tədbirin sonunda forumda iştirak edən qonaqlara, təhsil ictimaiyyətinin nümayəndələrinə, müəllimlərə, təlimçilərə və tədbirin təşkilində əməyi olan hər kəsə təşəkkür ifadə olunub.
Beləliklə, “Bilik Günü”nə həsr olunan Təhsil Forumu təhsilə verilən dəyərin, həmrəyliyin və gələcəyə inamın ifadəsi kimi yadda qalıb.
