Məhşur tikinti şirkəti dövlətə milyonlarla borcunun yarısını ödəməyə məcbur edildi

“AZR Business” Məhdud Məsuliyyətli Cəmiyyəti (MMC) yığılmış vergi borcunun təxminən yarısını bağlayıb. 

Yurd.Media-nın əldə etdiyi məlumata görə, əsasən elektrik şəbəkələrinin qurulması istiqamətində fəaliyyət göstərən şirkət dövlətə olan 5 073 278 manat borcun təxminən yarısını, 2 384 155 manatını ödəyib. Hazırda “AZR Business” MMC-nin 2,69 milyon manat vergi borcu var.

Qeyd edək ki, “AZR Business” MMC 2021-ci ildən tikinti quraşdırma işləri, elektrik şəbəkələrinin qurulması və.s tikinti işləri, o cümlədən tikinti materiallarının (mərmər,qranit, dəmir boru profillər, armatur, MDF, DSP və.s) istehsalı və idxalı ilə məşğul olur. Nizamnamə kapitalı 10 manat olan “AZR Business”in direktoru Hadı Əliyevdir. Ona bir neçə il əvvəl ölkədən çıxışına "stop" qoyulmuşdu. 

“AZR Business” MMC Sabirabad rayonunun Kovlar kəndinin elektrik şəbəkəsi, Laçın şəhərində küçə işıqlandırılması, Laçın və Xocalı (Malıbəyli kəndi) rayonlarında bərpa-quruculuq işləri, həmçinin Laçında qum-çınqıl karxanası qurub.

Xatırladaq ki, bir müddət əvvəl Binəqədi Rayon Məhkəməsinin qərarı ilə “AZR Business” cərimə olunmuşdu.