Bakıda binalara dolan qurdlar haradan gəlir? - Sakinləri təşvişə salan qurdların sirri açıldı
Bakıda son günlər çoxmərtəbəli binalarda qurdların artması sakinləri ciddi narahat edir. Nizami rayonu, Bəhruz Nuriyev küçəsi, 37 və 39 ünvanlarında yerləşən binalarda vəziyyət getdikcə pisləşir. Sakinlər bildirirlər ki, uzun müddətdir dezinfeksiya işləri aparılmadığından qurdlar binadan binaya yayılmağa başlayıb və sanitar vəziyyət təhlükə altına düşüb.
Oxşar mənzərə bir neçə gün əvvəl Xətai rayonunun Gəncə prospektində də yaşanıb. Orada da qurdların çoxalması səbəbindən evlərə dolması sakinlərin rahatlığını pozub.
Mövzu ilə bağlı “Yeni Sabah”a danışan heyvanlar üzrə mütəxəssis Samir Məmmədov bildirib ki, bu qurdların insanlara heç bir zərəri yoxdur:
“Əslində bu qurdlar ancaq ağaclara zərər verə bilir. Daha sonra digər növ bəzi qurdal kimi kəpənəyə çevrilirlər və daha sonra yumurta qoyub prosesi davam etdirirlər. Bu qurdlar ancaq yarpaqlarla qidalanırlar. Onların olduğu yerləri sadəcə dərmanlamaqla kökünü kəsmək olur. Bizə məxsus olan qurd deyil, haradansa başqa ölkədən gəlib. Yəqin ki, hansısa meyvənin içərisində gəlib artıq bir müddətdir ki, Bakıda yayılıb”.
Mütəxəssis qeyd edib ki, isti havalarda bu qurdların fəaliyyəti daha çox olur:
“İsti havalarda daha çox olurlar, nə qədər ki, ağacların yarpaqları yaşıldır, dayanmadan yarpaqlarını yeyib ziyan vururlar.
Onlar pup dövrünə, yəni qurddan kəpənək olmağa keçmək üçün özlərinə yerlər axtarırılar. Bu dövrdə onlara yığışıb qalmağa yer lazım olur, məhz bu səbəbdən ağacdan enib binalara, evlərə, divarlara üz tuturlar. İnsanlara heç bir ziyanları yoxdur, onlardan qorxmağa dəyməz, heç bir xəstəlik daşıyıcısı deyillər”.
Samir Məmmədov söyləyib ki, qurdların qarşısını almaq üçün vaxtında dərmanlama işləri aparılmalıdır:
“Sadə dərmanlama ilə onlar məhv olurlar. Növbəti ildə də həmin ərazilərə dərmanlama ilə yumurtaların qarşısını almaq olur.
Onlar çox sürətlə çoxalırlar və toplu halda insanlar onları gördükləri üçün təşvişə düşüblər. Ağaclarda yaşadıqları vaxtlarda çox görsənmirlər, amma əslində ağaclarda həddindən artıq çox olurlar. Cəmi bir həftəyə bütün ağacın yarpaqlarını yeyib bitirə bilərlər. Dərmanlama ilə onlardan qurtulmaq mümkündür, ciddi problem yaratmırlar”.
