Bu universitetlərdə bakalavr təhsili 3 ilə enir

Kocaeli Universitetinin rektoru, professor Dr. Nuh Zafer Cantürk, Ali Təhsil Şurasının (YÖK) istəkli və uğurlu tələbələr üçün bakalavr təhsil müddətini 3 ilə endirməyi hədəfləyən layihəsi barədə danışaraq, bu addımın akademik nailiyyətləri təşviq edəcəyini bildirib.
 
Xpress.az xəbər verir ki, Kocaeli Universitetindən verilən məlumata görə, rektor Cantürk, YÖK sədri professor Dr. Erol Özvar ilə görüş keçirib. Görüşdə “araşdıran universitet” vizyonu istiqamətində aparılan fəaliyyətlər və ali təhsildəki son yeniliklər müzakirə olunub.
Açıqlamada rektor Cantürkün fikirlərinə də yer verilib. O, YÖK tərəfindən həyata keçirilən yeni modelin yalnız bilik ötürülməsi deyil, həm də düşünmə və istehsal proseslərini əhatə edən təhsil vizyonunu gücləndirəcəyini bildirib. Cantürk qeyd edib ki, təhsil müddətinin qısaldılması nəticəsində ixtisaslı insan resursu istehsal proseslərinə daha sürətli qoşulacaq.
Rektor vurğulayıb ki, əsas məqsədləri tələbələrin yüksək səviyyəli bilik və bacarıqlara yiyələnərək, iş dünyasında fərq yaradan mütəxəssislər kimi yetişməsidir. O, bu istiqamətdə aparılan bütün yenilikçi modelləri dəstəklədiklərini və onların tətbiqinə hazır olduqlarını qeyd edib.
Cantürk əlavə edib:
“Bu proses dayanıqlı iqtisadi inkişaf üçün birbaşa və konkret töhfələr verəcək, milli inkişafın hərəkətverici qüvvəsinə çevriləcək. Pilot bölgə elan edilən Kocaelinin aparıcı təhsil müəssisəsi kimi Kocaeli Universiteti bu mühüm dönüşümün fəal tətbiqedicisi və öncüsü olmağı çox istəyir. YÖK sədrimizin göstərişi ilə universitetimizdə bu modelin uğurla həyata keçirilməsi üçün bütün akademik və inzibati hazırlıqlara dərhal başlanılıb. Biz gənclərimizə inanırıq və onların potensialını maksimum səviyyədə reallaşdırmalarını təmin edəcək bütün addımları atmağa hazırıq.”