Mərkəzi Bank oktyabrın 22-də nə qərar verəcək?

Azərbaycan Mərkəzi Bankı (AMB) bu həftə, oktyabrın 22-də uçot faiz dərəcəsi ilə bağlı növbəti qərarını açıqlayacaq. Mərkəzi Bank sonuncu dəfə iyulun 23-də son bir ildə ilk dəfə olaraq uçot dərəcəsini 7,25%-dən 7%-ə endirib, daha sonra isə sentyabrın 10-da bu göstəricini sabit saxlayıb.

Xpress.az xəbər verir ki, iqtisadçı Fuad İbrahimov Kredit.az-a növbəti qərarın hansı istiqamətdə olacağı barədə açıqlama verib. AMB-nin iyul ayında belə bir qərar verdiyini xatırladan iqtisadçı hesab edir ki, uçot dərəcələrinin azaldılması hər zaman iqtisadi aktivliyin artırılmasına xidmət edən bir siyasətdir:

“Mərkəzi Bankın bugünkü fəaliyyəti, xüsusilə son üç ildə görülən işlər göstərir ki, qurum müstəqillik dövründə ən çevik, tarazlığı qoruyan və sabitlik istiqamətində addımlayan maliyyə institutlarından biridir. O, mövcud iqtisadi şəraitdə əlindəki bütün alətlərdən məharətlə istifadə etməklə, həm daxili sabitliyi, həm də maliyyə sisteminin dayanıqlığını qorumağı bacarır.

Postpandemiya dövrünün yaratdığı qlobal inflyasiya dalğasının həm dünya, həm də Azərbaycan iqtisadiyyatına ciddi təsir göstərdiyini nəzərə alsaq, bu şəraitdə Mərkəzi Bankın apardığı siyasət ilk növbədə inflyasiyanın cilovlanmasına yönəlmiş effektiv özünümüdafiə mexanizmi formalaşdırdığını deməyə əsas verir.

Mən hesab edirəm ki, bu tarazlığı qorumağa imkan verən fəlsəfə və siyasət hazırda da uğurla davam etdirilir. Uçot dərəcələrinin azalması məsələsinə gəldikdə isə, iyul ayında bunun artıq baş verdiyini xatırlatmaq lazımdır. Əgər bu proses ardıcıl şəkildə davam edərsə, nəzəri baxımdan belə nəticəyə gəlmək olar ki, uçot dərəcəsinin azaldılması iqtisadi aktivliyin artırılmasına xidmət edən yumşaq monetar siyasətin göstəricisidir. Bu addım eyni zamanda inflyasiyanın plan üzrə idarə olunmasına yönəlmiş siyasətin təsdiqi kimi də qiymətləndirilə bilər”.

İqtisadçı bildirib ki, hər bir halda, uçot dərəcəsi azalsa da, stabil qalsa da, mövcud makroiqtisadi tarazlıq fonunda Mərkəzi Bankın monetar siyasəti qorunub saxlanılır:

“Bu istiqamətdə atılan addımlar ümumi iqtisadiyyatın sabit və idarəolunan bir dəhlizdə — yəni üfüqi dalğalanma çərçivəsində inkişaf etdiyini göstərir. Azalma meyli bir daha inflyasiyanın cilovlanmasının və planlı şəkildə tənzimlənməsinin göstəricisidir. Bununla yanaşı, bu proses iqtisadi aktivliyin artırılması istiqamətində atılmış mühüm və müsbət bir addım kimi də dəyərləndirilə bilər. Hər bir halda, konkret zaman və şərait daxilində bu dinamikanı diqqətlə izləmək və qiymətləndirmək vacibdir”.