Özəl sektor üçün yeni yük: Artan vergilər, azalan gəlirlər -Ekspertən açıqlama
Son günlər özəl sektorda çalışanların gəlir vergisinə dair müzakirələrin yenidən gündəmə gəlməsi ictimai maraq doğurur. Mövcud vergi yükü özəl sektorda çalışan vətəndaşlar üçün ədalətlidirmi, yoxsa bu sahədə dəyişikliklərə ehtiyac varmı? Mövzu ilə bağlı iqtisadçı- ekspert Natiq Cəfərli Xpress.az-a danışdı.
Natiq Cəfərlinin sözlərinə görə, 2019-cu ildə özəl və qeyri-neft sektorunda çalışanlar üçün 7 illik vergi güzəşti tətbiq olunmuşdu. Həmin qərara əsasən, bu kateqoriyaya aid işçilər gəlir vergisindən azad edilərək, əvəzində 10 faiz Dövlət Sosial Müdafiə Fonduna ödəniş etmişdilər.
“Hazırda problem ondadır ki, 10 faizlik sosial müdafiə ödənişi qüvvədə qalır, lakin bundan əlavə 2500 manata qədər maaş alan şəxslərdən 3 faiz gəlir vergisi tutulacaq. Bununla yanaşı, 2,5 faiz tibbi sığorta və işsizlik sığortası üzrə məcburi icbari ödənişlər də əlavə olunur. Nəticədə ümumi vergi yükü təxminən 5,5 faiz artacaq,” – deyə iqtisadçı bildirib.
O qeyd edib ki, bu artım özəl sektorda çalışanların real gəlirlərinə mənfi təsir göstərəcək:
“Mən düşünmürəm ki, özəl sektorda maaş artımı olacaq. Maaşlar eyni qalacaq, amma vergi yükü artacaq. Bu isə vətəndaşların gəlirlərinin azalması deməkdir".
Afaq Qurbanzadə
