17 Noyabr – Milli Oyanış Gününün Tarixi Əhəmiyyəti
17 Noyabr – Milli Oyanış Günü: Azərbaycan tarixinin dönüş nöqtəsi
Azərbaycanın yaxın tarixində mühüm mərhələ olan 17 noyabr 1988-ci il bu gün Milli Oyanış Günü kimi qeyd olunur. Xpress.az xəbər verir ki, Türk Dünyası Siyasətlərindən Məsul, Zafer Partiyası Ümumi Sədr Başdanışmanı Gencehan Tunay sosial şəbəkə hesabında həmin günün tarixi əhəmiyyətinə diqqət çəkib.
O bildirib ki, 1988-ci ildə cəmi 7 milyon əhalisi olan Azərbaycanda milyonlarla insan Bakının Lenin (indiki Azadlıq) meydanına axışaraq, gecə-gündüz davam edən böyük bir azadlıq hərəkatını başlatmışdı.
Bu oyanış – Sovet imperiyasının təzyiqlərinə, Qarabağda erməni təcavüzünə və rus işğalının ağır zülmünə qarşı yüksələn milli dirçəliş idi. Sovet qoşunlarının meydanlarda dinc azərbaycanlılara qarşı törətdiyi zorakılıq xalqın iradəsini qıra bilmədi; əksinə, milli şüur daha da gücləndi.
Milli oyanış dalğası meydanlarla məhdudlaşmadı. Qarabağın azadlığı, Sovet əsarətinin sona çatdırılması, müstəqil Azərbaycan dövləti ideyası və Güney Azərbaycanın birliyi arzusu ətrafında xalq sıx birləşdi. Dirəniş genişləndikcə həmrəylik də artdı və proses Azərbaycan Xalq Cəbhəsinin yaradılmasına gətirib çıxardı.
O günlərdə meydanlarda dalğalanan üçrəngli bayraq, Türk bayrağı və Atatürk portretləri xalqın milli kimliyi və türkçülük düşüncəsinin gücünü nümayiş etdirirdi.
Bu gün 17 noyabr — Azərbaycan xalqının milli həmrəyliyinin, azadlıq ruhunun və türkçülük ideallarının simvolu kimi anılır.
Gencehan Tunayın qeyd etdiyi kimi, həmin dirəniş həm Azərbaycana, həm də bütün Türk dünyasına göstərdi ki, millət iradəsini heç bir təzyiq, təhdid və ya işğal gücü məğlub edə bilməz. Bir vaxtlar dünyanın ən böyük imperiyasına qarşı qətiyyətlə yüksələn Azərbaycan türkləri necə ki, müstəqilliyinə qovuşdu, bu gün də Türk dövlətini və millətini hədəfləyən hər cür bölücülük və təhdidə qarşı eyni qətiyyətlə dayanmaq əzmindədir.
Bu ruh — Türkiyəyə və bütün Türk dünyasına yönəlmiş hər cür təhdidə qarşı millət iradəsinin daim üstün olduğunu xatırladan sarsılmaz mövqedir.
17 Noyabr – Milli Oyanış Günü mübarək olsun!
