Asiya pulları Bakıya axır? - ADB-nin nəhəng planı Azərbaycan iqtisadiyyatını silkələyə bilər
2025-ci ilin ilk doqquz ayında ticarət dövriyyəsinin — xüsusilə də Mərkəzi Asiya ölkələri ilə əməkdaşlığın — kəskin artması, eləcə də Asiya İnkişaf Bankının (ADB) 2025–2029-cu illər üçün nəzərdə tutduğu genişmiqyaslı investisiyalar Azərbaycanın iqtisadi strategiyasına və qeyri-neft sektorunun inkişafına hansı yeni imkanlar aça bilər? Məsələ ilə bağlı Milli Məclisin III, IV, V və VI çağırış deputatı, iqtisad elmləri doktoru, professor Rüfət Quliyev Xpress.az-a açıqlamasında bildirib.
"Qısa desək, bütün ölkələrdə iqtisadi inkişafın əsas təkanverəni investisiyalardır. Nə qədər çox investisiya qoyularsa və onlar effektiv şəkildə istifadə olunarsa, o qədər də ölkənin — o cümlədən Azərbaycanın — iqtisadi inkişafı və iqtisadi qüdrəti artır. Dövlətin öz investisiyalarının həcmi kifayət qədər böyükdür və bu, marağın yüksək olduğunu göstərir. Lakin bu gün prioritet xarici investisiyalardır. Xarici investisiyalar yalnız maliyyə deyil, həm də yeni texnologiya və innovasiya deməkdir. İstənilən halda, investisiyalar nə qədər çox və səmərəli istifadə olunarsa, qeyri-neft sektorunda da onların bəhrəsini tezliklə görəcəyik."
Afaq Qurbanzadə
