Azad Torpaqlarda Yeni Dövr: Qarabağa İnvestisiya Axını Başlayır?
Uzun illər işğal altında qalan torpaqlarda azadlıqdan sonra sürətlə aparılan bərpa işləri bu gün artıq real nəticələri ilə seçilir. Hər kəsi maraqlandıran əsas sual isə belədir: azad edilən ərazilərin yenidən qurulması və inkişafı yaxın zamanda bu bölgələrdə geniş investisiya imkanları yaradacaqmı? Mövzu ilə bağlı Milli Məclisin deputatı Aydın Hüseynzadə Xpress.az-a fikirlərini bölüşüb.
Deputat qeyd edib ki, işğaldan azad edilmiş ərazilər bu gün Azərbaycan üçün yalnız coğrafi məkan deyil, həm də yenidən doğuluşun, iradənin və dövlətçilik əzminin simvoludur. Uzun illər dağıdılmış şəhər və kəndlərin yerində hazırda tamamilə yeni inkişaf modeli formalaşır. Bölgədə aparılan bərpa prosesi həm müasir texnologiyalara, ağıllı-infrastruktur konsepsiyasına, həm də milli-mənəvi irsin qorunmasına əsaslanır. Hər bir tikili, hər yol və hər layihə bu torpaqların yenidən nəfəs aldığını, daha güclü şəkildə gələcəyə addımladığını göstərir.
Aydın Hüseynzadənin sözlərinə görə, bərpa siyasətinin ana xəttini dayanıqlı inkişaf təşkil edir. Ərazilərin ekoloji təmiz potensialı, kənd təsərrüfatına yararlı torpaqları və turizm üçün unikal təbiəti regionun rəqabət üstünlüyünü artıran əsas amillərdir. Qarabağ və Şərqi Zəngəzur artıq ağıllı kənd modeli, yaşıl enerji zonaları və yeni logistika xətləri ilə seçilən strateji mərkəzə çevrilir. Bu, dövlət planlaması ilə özəl sektorun fəal iştirakını birləşdirən modern inkişaf fəlsəfəsidir.
Deputat hesab edir ki, investisiya baxımından region hələ tam istifadə olunmamış geniş potensiala malikdir. Sürətlə qurulan infrastruktur istehsal, tikinti, kənd təsərrüfatı, emal sənayesi və turizm sahələrində yeni imkanlar yaradır. Xarici və yerli investorlar üçün açıq olan layihələr uzunmüddətli dayanıqlılığı, geniş bazar perspektivini və dövlət dəstəyini özündə birləşdirir.
Onun fikrincə, bu torpaqların yenidən qurulmasında iştirak etmək həm ciddi iqtisadi fayda, həm də tarixi prosesin bir parçası olmaq deməkdir. Regionun gələcək siması artıq formalaşır — bu simada həm inkişafın enerjisi, həm də sülhün və quruculuğun ruhu aydın şəkildə görünür.
Afaq Qurbanzadə
