Rusiya-Ermənistan Münasibətlərində Soyuqluq: Bakı Avantajlı Mövqedə
Rusiya ilə Ermənistan arasındakı münasibətlərdəki dəyişikliklər regiondakı tarazlığa ciddi təsir göstərə bilər. Bu, Azərbaycan üçün həm siyasi, həm də təhlükəsizlik baxımından yeni imkanlar və çağırışlar yaradır. Güc balansının dəyişməsi diplomatik manevr imkanlarını artırır, strateji mövqelərin güclənməsinə şərait yaradır, eyni zamanda potensial gərginlik və qeyri-müəyyənlikləri də gündəmə gətirir.
Politoloq Tural İsmayılov Xpress.az-a açıqlamasında bildirib ki, Rusiya ilə Ermənistan arasında soyuqluq regiondakı ənənəvi geosiyasi tarazlığın tədricən pozulduğunu göstərir. Ermənistanın KTMT-dən uzaqlaşması və Moskvanın təhlükəsizlik zəmanətlərinə şübhə ilə yanaşması Rusiyanın Cənubi Qafqazdakı təsirini zəiflədir. Bu fonunda Rusiya Ermənistan üzərində əvvəlki siyasi və hərbi nəzarətini itirir, Ermənistan isə boşluğu Qərb platformaları və ikitərəfli əməkdaşlıqla doldurmağa çalışır.
Bu tendensiya Azərbaycan üçün strateji manevr imkanlarını genişləndirir. Rusiya faktorunun zəifləməsi Bakının diplomatik mövqeyini gücləndirir, Qərbin regiondakı fəallığının artması isə yeni tərəfdaşlıq imkanları açır, lakin ehtiyatlı siyasət tələb edir. Təhlükəsizlik baxımından isə Ermənistan ordusunun əməliyyat qabiliyyəti zəifləyir ki, bu da Azərbaycanın üstünlüyünü möhkəmləndirir. Eyni zamanda Ermənistan daxilində qeyri-sabitlik və revanşist çağırışlar riski də qalır.
Azərbaycanın əsas çağırışı regiondakı güc boşluqlarını balanslı şəkildə idarə etməkdir. Bakı həm Rusiya ilə dialoqu qoruyur, həm də Qərblə əlaqələrini genişləndirir. Nəqliyyat dəhlizlərində Moskvanın təsirinin azalması Zəngəzur istiqamətində yeni imkanlar yaradır, İran isə boşluq fonunda daha aktiv mövqe tuta bilər. Nəticədə Rusiya-Ermənistan münasibətlərindəki dəyişikliklər Azərbaycan üçün strateji imkanlar açır və Bakı bu mürəkkəb geosiyasi transformasiyanı real güc balansına uyğun şəkildə idarə etməyə çalışır.
Afaq Qurbanzadə
Xpress.az
