Hindistan və ABŞ ilin sonuna qədər ticarət sazişi bağlamağı planlaşdırır
Hindistan bu ilin sonuna qədər ABŞ ilə çərçivə ticarət sazişi bağlamağı hədəfləyir.
Bu barədə Hindistanın ticarət katibi Rajesh Agraval məlumat verib.
“Düşünürəm ki, deyə biləcəyim tək şey odur ki, biz razılaşmaya yaxınıq və əksər məsələləri həll etmişik. İlk növbədə qarşılıqlı tarifləri həll edəcək çərçivə sazişinə ehtiyacımız var. Biz nikbinik və cari il ərzində həll yolu tapa biləcəyimizə ümid edirik”, — deyə Agraval bildirib. O, bütün fikir ayrılıqlarının siyasi səviyyədə həll edilə biləcəyini də əlavə edib.
İki ölkə arasında danışıqlar davam etsə də, ABŞ avqustun sonlarından etibarən Hindistan idxalına 50%-ə qədər tarif tətbiq edib. ABŞ administrasiyası Hindistana Rusiyadan neft alışını azaltmaq və kənd təsərrüfatı kimi həssas sektorlar üzrə tarifləri endirmək üçün təzyiq göstərir.
