Ukraynalı deputat: "Rusiya Ukrayna ilə yox, öz geosiyasi səhvləri ilə savaşır”
Ukrayna–Rusiya müharibəsi başladığı gündən bu günə qədər beynəlxalq arenada bir sıra hadisələr və ciddi dəyişikliklər baş verib. Məsələn, müharibənin ilk mərhələlərində ABŞ Ukraynanı açıq şəkildə dəstəkləyirdi. Lakin son sülh planı ətrafında yaranan müzakirələrdən sonra bəzi siyasətçilər ABŞ-ın mövqeyində dəyişiklik olduğu, Vaşinqtonun Ukraynaya münasibətində əvvəlki kimi qətiyyət göstərmədiyini iddia edirlər. Digər tərəfdən, Avropa Birliyinin Ukraynaya humanitar, hərbi və iqtisadi dəstək verdiyi bütün dünya ictimaiyyətinə məlumdur. Son vaxtlar isə belə bir fikir formalaşıb ki, Rusiya əslində Ukrayna ilə deyil, bütövlükdə Avropa ilə savaşır. Məsələ ilə bağlı ukraynalı deputat, hüquq elmləri doktoru, professor Aleksandr Marejko Xpress.az-a açıqlama verib.
Professor Marejko bildirib ki,
“Rusiya üçün ABŞ həmişə düşmən olub. Donald Trampın yenidən siyasi səhnəyə qayıtması Kremlin bu yanaşmanı açıq şəkildə etiraf etməsinə mane olur – çünki Rusiya Tramp dövründə münasibətlərin yumşalacağına ümid edir. Avropanı isə yalnız passivlikdə ittiham etmək olar. Onu Rusiyanın düşməni kimi qələmə vermək absurddur. Avropa Rus torpaqlarını ələ keçirməyə hazırlaşmır, sadəcə Rusiyanın davranışlarını və imkanlarını qiymətləndirir.
Rusiya üçün əsas təhlükə nə Avropadır, nə də ABŞ. Kreml üçün real geosiyasi təhlükə Çindir. ABŞ üçün isə bölgədə baş verən proseslərin detalları ikinci plandadır. Əgər Rusiyada normal düşünən siyasətçilər olsaydı, anlayardılar ki, Çin onların gələcək suverenliyi üçün əsas riskdir. Tarazlığı qorumaq üçün Rusiya Avropa və ABŞ-la münasibətlərini yaxşılaşdırmalı və şimal bölgələrinin, eləcə də digər geniş ərazilərin inkişafı üçün qərb investisiyasını cəlb etməlidir. Bir daha qeyd edirəm: əgər Rusiyada rasional siyasət yürüdən rəhbərlik olsaydı, hər kəslə münasibətləri normallaşdırmağa çalışardı.”
Afaq Qurbanzadə
Xpress.az 
