Avropa İttifaqı Azərbaycanı enerji dəhlizində manipulyasiya etmək istəyir? - Deputat AÇIQLADI

Azərbaycan və Avropa İttifaqı arasında tərəfdaşlıq sazişi üzrə danışıqlar yenidən aktivləşib. Brüssel tərəfi yaşıl enerji, nəqliyyat dəhlizləri və regional sabitlik kimi məsələlərin müzakirə olunacağını açıqlayıb. Bu yeni danışıqlar mərhələsində Azərbaycan üçün əsas strateji üstünlüklər və risklər nələrdir? O cümlədən, Zəngəzur dəhlizinin və Qarabağ sonrası geosiyasi vəziyyətin bu prosesə təsiri necə olacaq? Mövzu ilə bağlı Milli Məclisin deputatı Asim Mollazadə xpress.az saytına açıqlamasında fikirlərini bölüşüb.

Deputat bildirib ki,bu layihə reallaşsa, Avropa İttifaqı nəqliyyat sistemi sahəsində öz hədəflərinə nail ola bilər. Azərbaycanın yaşıl enerji sahəsindəki fəaliyyətləri və Orta Asiyada qardaş ölkələrlə birgə həyata keçirdiyi layihələr Avropa İttifaqı üçün böyük əhəmiyyət kəsb edir. Azərbaycan istəyir ki, Avropa İttifaqı bir çox layihələrə investisiyaçı qismində qatılmaqla bu əməkdaşlığı gücləndirsin. İndiyə qədər bir çox layihənin əsas investoru Azərbaycan olub. Əgər Avropa İttifaqı enerji dəhlizini genişləndirmək və enerjini daha çox əldə etmək istəyirsə, müvafiq investisiyaları təmin etməlidir və düşünürəm ki, bu istiqamətdə onlar prosesdə iştirak edəcəklər. Onun sözlərinə görə, "Azərbaycanın marağı həmçinin təhsil və mədəniyyət sahələrinə yönəlib. Çünki Azərbaycan tarixən Şərq və Qərb mədəniyyətlərinin sintezini yaradan bir ölkədir və bu əməkdaşlıq yeni inkişaf imkanlarına təkan verəcək".

Afaq Qurbanzadə 

Xpress.az