Xaçmazda peşə təmayüllü şagirdlərlə Peşə Liseyi direktorunun görüşü keçirilib
4 dekabr 2025-ci il tarixində Xaçmaz rayonunun Qımılqışlaq kəndində yerləşən Şəmsəddin Sədiyev adına tam orta məktəbdə peşə təmayüllü siniflərlə Xaçmaz Şəhər Peşə Liseyinin direktoru Tural Məmmədovun görüşü təşkil olunub.
Görüş zamanı Tural Məmmədov şagirdlərin peşə hazırlığı ilə yaxından tanış olub, onlarla fərdi və qrup halında söhbətlər aparıb. O, şagirdlərə seçdikləri peşəni daha dərindən sevmələri və bu istiqamətdə inkişaf etmələri üçün faydalı tövsiyələr verib. Direktor həmçinin məktəbdə mövcud peşə avadanlıqlarını nəzərdən keçirib, şagirdlərin avadanlıqlarla praktik məşğələlərini izləyərək fəaliyyətlərini qiymətləndirib.
Tədbir çərçivəsində peşə hazırlığını uğurla başa vuran məzunlara sertifikatlar təqdim edilib.
Tural Məmmədov çıxışında şagirdlərə məqsədlərinə doğru əzmlə irəliləməyi, daim öz üzərlərində çalışmağı və seçdikləri sahəyə sevgi ilə yanaşmağı tövsiyə edib. Məktəb rəhbərliyi görüşə görə direktora təşəkkürünü bildirib.
Müəllim kollektivi belə təşəbbüslərin şagirdlərin motivasiyasına müsbət təsir etdiyini vurğulayaraq, peşəyə marağın artırılması üçün bu cür tədbirlərin davamlı olmasının vacibliyini qeyd edib.
Görüşün sonunda gələcək nəsillərin daha hazırlıqlı və peşəkar yetişməsi üçün “öyrənək və öyrədək” çağırışı səsləndirilib.
