Niyə divanda yatmaq özünüzə hörmətsizlikdir?
Uzun və yorucu bir gündən sonra hər kəs bədəninə güc, ruhuna isə sabah üçün yaxşı əhval-ruhiyyə bəxş edəcək sakit və rahat yuxu arzulayır. Amma heç düşünmüsünüzmü, harada yatmağınızın nə qədər böyük əhəmiyyəti var?
Axı düzgün yatacaq seçimi təkcə rahatlıq məsələsi deyil, eyni zamanda sağlamlığınıza və həyat keyfiyyətinizə göstərdiyiniz qayğının göstəricisidir.
Yuxu üzrə mütəxəssis, professor, tibb elmləri doktoru və Rusiya Federasiyasının əməkdar həkimi Roman Buzunov DAY.RU-ya verdiyi müsahibədə divanda yatmağın niyə yaxşı seçim olmadığını izah edib.
Onun sözlərinə görə, xüsusilə köhnə divanlar ciddi problem yaradır. Belə divanlar çox vaxt iri çıxıntılı yaylardan ibarət olur və üzəri nazik dəri və ya parça qatından başqa heç nə ilə örtülmür. Bu isə bədən üçün nə rahat, nə də təhlükəsizdir.
Hətta qatlanan müasir divanlar belə, adətən, kifayət qədər sərt və narahat olan poliuretan köpük lövhələrdən hazırlanır. Bu cür konstruksiyalar heç bir anatomik və ya ortopedik üstünlük vermir və sağlam yuxu üçün uyğun sayılmır.
Həkim vurğulayır ki, divanlar əsasən yuxu üçün deyil, məkan qənaəti məqsədilə alınır. Doğrudur, bu gün anatomik döşəkli divanlar mövcuddur, lakin onların qiyməti kifayət qədər yüksəkdir.
“Yadımdadır, mən də vaxtilə köhnə qatlanan divanda yatmışam. Açanda əyilir, ‘klik’ səsi çıxarırdı — çox acınacaqlı vəziyyət idi. Təəssüf ki, hətta müasir poliuretan köpük lövhəli divanlar belə hələ də istənilən keyfiyyəti təmin etmir”, — deyə Roman Buzunov qeyd edib.
