Uşaqlar palçıq içində məktəbə gedir: VƏZİYYƏT DÖZÜLMƏZDİR
Abşeron rayonunun Masazır qəsəbəsində 4 və 7 nömrəli tam orta məktəblərin qarşısındakı yollar yağış yağdığı zaman palçıqdan keçilməz vəziyyətə düşür, valideynlər bu vəziyyətdən narazılıqlarını bildiriblər. Sakinlər və valideynlərin sözlərinə görə, yağıntıdan dərhal sonra məktəblərin önündəki küçələrdə palçıqla örtülü hissələr yaranır ki, bu da uşaqların məktəbə gediş-gəlişini çətinləşdirir. Avtomobillər palçığa ilişir, piyadalar üçün hərəkət təhlükəli olur. Bu vəziyyət həm sərnişinlərin rahatlığını pozur, həm də yol təhlükəsizliyi baxımından risk yaradır.
Abşeron Rayon İcra Hakimiyyətindən Xpress.az-a bildirilib ki, daxili küçələr bələdiyyələrin balansında olduğu üçün yolların abadlaşdırılması işləri yerli özünüidarəetmə orqanlarının büdcə imkanları çərçivəsində həyata keçirilir. Bələdiyyələrin büdcələri əsasən sakinlərin ödədiyi vergilərdən formalaşdığından yeni küçələrin asfaltlanmasında müəyyən gecikmələr müşahidə olunur. Buna baxmayaraq, küçələrin asfaltlanması həm Abşeron RİH, həm də yerli bələdiyyə tərəfindən daim diqqətdə saxlanılır və işlər mərhələli şəkildə həyata keçirilir. Son 4 il ərzində Masazır kəndində əsasən şəhidlərimizin adını daşıyan və onların ailələrinin yaşadığı küçələrdə, eləcə də mərkəzi yollarda abadlıq və asfaltlanma işləri aparılıb. Ötən il kəndin 17 daxili küçəsində abadlıq işləri həyata keçirilib. Bu il isə Abşeron, Şəfiqə Axundova, Şəhid Əsəd Əsədov, Seyid Əzim Şirvani və Şəfiqə Heybətova küçələri asfaltlanaraq sakinlərin istifadəsinə veriləcək. Həmçinin, Masazır 6 saylı tam orta məktəbin yerləşdiyi Abşeron küçəsi də əsaslı şəkildə abadlaşdırılacaq. Hazırda bu istiqamətdə sənədləşmə işləri son mərhələdədir və yaxın həftələrdə işlərə başlanacaq. Kənddə yeni salınan daxili küçələrin abadlaşdırılması və sakinlərin istifadəsinə verilməsi məsələsi daimi olaraq yerli bələdiyyənin nəzarətindədir.
