Qanun DƏYİŞİR – Bu obyektlərin tikintisi üçün icazə tələb olunacaq

Kənd təsərrüfatı fəaliyyəti ilə bağlı bəzi obyektlərin tikintisi üçün icazə tələb olunacaq.

Bu məsələ Milli Məclisin bu gün keçirilən iclasında “Azərbaycan Respublikasının Torpaq Məcəlləsində dəyişiklik edilməsi haqqında” Azərbaycan Respublikasının 2024-cü il 28 iyun tarixli 1194-VIQD nömrəli Qanununun icrası ilə əlaqədar Azərbaycan Respublikasının bəzi qanunlarında dəyişiklik edilməsi barədə” qanun layihəsində öz əksini tapıb.
 

Qüvvədə olan qanuna görə, mülkiyyətdə, icarədə və ya istifadədə olan torpaq sahəsində hündürlüyü ən çoxu 5 metr, sahəsi 100 kvadratmetr olan bir mərtəbəli yardımçı tikililərin, kənd təsərrüfatı, meşə təsərrüfatı və balıqçılıq fəaliyyəti ilə bağlı obyektlərin tikintisinə icazə tələb olunmur.

Layihəyə əsasən, mülkiyyətdə, icarədə və ya istifadədə olan torpaq sahəsində hündürlüyü ən çoxu 5 metr, sahəsi 100 kvadratmetr olan kənd təsərrüfatı tikintisinə icazə tələb olunacaq.

Həmçinin, xüsusi mülkiyyətdə olan torpaq sahələrində həcmi ən çoxu 60 kubmetr və dərinliyi ən çoxu 5 metr olan quyuların, (kənd təsərrüfatı təyinatlı tikilənlər istisna olmaqla) yeraltı su və çirkab su anbarlarının (rezervuarların), habelə həcmi ən çoxu 200 kubmetr olan hovuzların, tutumu 100 nəfərə qədər olan müvəqqəti tikililərin (kənd təsərrüfatı təyinatlı tikilənlər istisna olmaqla), hündürlüyü ən çoxu 3 metr və sahəsi ən çoxu 300 kvadratmetr olan istixanaların (kənd təsərrüfatı təyinatlı tikilənlər istisna olmaqla) və oranjereyaların tikintisinə icazə tələb olunmayacaq.

Qanun layihəsi səsə qoyularaq birinci oxunuşda qəbul edilib.