Rusiyada ciddi bahalaşma: Əhali yeni ili belə qarşılayır
Rusiya Yeni il şənliklərinə hazırlaşır, lakin bu, istehlakçı fəallığının nəzərəçarpacaq dərəcədə azalması fonunda baş verir. Xüsusən də, bahalaşma səbəbindən ruslar ciddi şəkildə qənaət etməyə məcbur olurlar.
Bu barədə Ukrayna Xarici Kəşfiyyat Xidməti məlumat yayıb.
"Qənaətə doğru ümumi tendensiya yaranır: ruslar getdikcə lazımsız xərcləri azaldır və özlərini minimum mal və xidmətlə məhdudlaşdırırlar. 2026-cı ili qeyd etmələri üçün orta büdcə təxminən 14 min rubl (297 manat) təşkil edir, bu da 2025-ci il üçün planlaşdırılan məbləğin demək olar ki, yarısıdır",- məlumatda deyilib.
Bildirilir ki, bu tendensiya inflyasiyanın artması, ərzaq, mənzil-kommunal xidmətlər və geyim qiymətlərinin artması ilə bağlıdır. Belə ki, hətta ənənəvi Yeni il süfrəsi də dəyişikliklərə məruz qalıb.
Ruslar xaricə səyahət etmək əvəzinə, xərcləri bölüşmək üçün çox vaxt böyük qruplar şəklində ölkə daxilində bağ evlərini kirayə götürməyi üstün tuturlar.
