Maduro nədə ittiham olunur və sübutlar nədir?

Venesuela prezidenti Nikolas Maduro ABŞ tərəfindən irəli sürülən ağır federal ittihamlarla üzləşir. ABŞ qüvvələrinin Maduro və həyat yoldaşını Karakasdakı bir binadan götürməsindən cəmi 48 saat sonra Venesuela lideri Manhettendəki federal məhkəmədə hakim qarşısına çıxıb və ona qarşı irəli sürülən ittihamlar üzrə özünü təqsirli bilmədiyini bəyan edib.

Dünya ictimaiyyəti ABŞ-ın başqa bir ölkənin fəaliyyət göstərən liderini hərbi əməliyyatla ələ keçirməsini müzakirə etdiyi bir vaxtda, Maduroya qarşı açılmış cinayət işi ABŞ-ın hüquq sistemi çərçivəsində, sübutlar və federal qanunlar əsasında araşdırılacaq.

İttihamlar nədən ibarətdir?

ABŞ prokurorlarının məhkəməyə təqdim etdiyi ittiham aktına əsasən, Nikolas Maduro, onun həyat yoldaşı və oğlu uzun illər ərzində kokain qaçaqmalçılığı ilə bağlı genişmiqyaslı sui-qəsddə iştirak etməkdə ittiham olunurlar. Prokurorlar iddia edir ki, onlar terror təşkilatı kimi tanınan narkotik kartelləri ilə əməkdaşlıq ediblər.

İttiham sənədində qeyd olunur ki, təqsirləndirilən şəxslər:

dövlət vəzifələrindən sui-istifadə ediblər,

əvvəllər qanuni fəaliyyət göstərən dövlət institutlarını korrupsiyaya uğradıblar,

ABŞ-a tonlarla kokainin qanunsuz idxalını təşkil ediblər.

Prokurorların fikrincə, bu fəaliyyətlər narkotik ticarətindən əldə olunan gəlirlərin artırılmasına və ABŞ-ın təhlükəsizliyinə ciddi təhdid yaradılmasına xidmət edib.

Maduronun mövqeyi

Nikolas Maduro və onun tərəfdarları bu ittihamları qəti şəkildə rədd edirlər. Maduro daha əvvəl belə iddiaları ABŞ-ın Venesuelanın zəngin neft ehtiyatlarına nəzarəti ələ keçirmək məqsədi güdən “imperiya planlarının” bir hissəsi adlandırmışdı.

O, ABŞ-ın hüquqi addımlarını siyasi motivli təzyiq aləti kimi qiymətləndirir və ittihamların legitim olmadığını bildirir.

Xpress.az